Not nouvèle voéture

Echt étè, m'fanme et mi avons acaté unne nouvèle voéture, ganne. Ganne conme l'boaiyète Pépète eq Renaud o connu i o quèks innées.

Conme os étoème fin ureus d'avir unne nouvèle voéture fin neuve, m'fanme et mi avons allé in vagances. In prindant no'caravane.

Os avons pèrti, et aprè deus-chint kilomètes, os avons du arter pour prinde ed l'essinche. Nan ! Poin, o pu d'essinche, mais ed l'éctricité.

- "Avinchez-lò (aisié) pi achteure, rtchulez-lò (malaisié)" eq nos esplique unne gin.

"Brin ! Ech cabe est trop tiot. Détatchez vo'caravane pi rtchulez."

Dis minutes à trafitcher, pi vint à rquèrtcher.

- "Os éroème du in mette avant ed pèrtir" qu'ej dis à m'f'anme.

- "J'in avoais mis ièr", qu'ale répond. "Os éroètes du pouvoèr pércourir chonc-chint kilomètes, qu'is avoai'te dit quanq qu'is nos os vindu l'voéture."

Os avons quanq minme rpèrti, avuc no'caravane, pi aperchu, infin, ches montaingnes.

"Mettez edl'ectricité" qu'i o d'écrit din l'voéture. Aprè avir rfoait chint-quarante-sèt kilomètes. 

Rin pour cho ! Obligés ed nos arter unne nuit din unne cinse pour brancher l'voéture.

Pi os avons rintré. In uit eures puss troés keups à arter.

Fin ureus, qu'os sonmes ! Avuc not nouvèle voéture, os avons granmint d'avintures.

A béto pour qu'ej vos in conte d'eutes.

Boinne jornée.

Ches tiots cadieus

... pour dire "ej t'ainme".

Mardi au vèpe, un tiot garchon ed trinte-quat moés et quèks jours dit à s'mère :

- "El mère, ej té baille ed tiots cailleus pastche ej t'ainme. Ti, jou eq tu ramasseros étou des tiots cailleus pour mi ?"

Busons !

Des tiots cailleus pour dire "ej t'ainme". Et quanq ch'est ed cros cailleus ?

Pensons achteure à ches cadoreus qui vu'te protéger ches gins et qui rchuvoe'te ed cros cailleus chu leus djifes.

Ureus savoéyèrds

Ches savoéyèrds ed Savoée o Heute-Savoée sont alintour d'un millon-troés-chint-mile gins qui vive'te in "grinde" Savoée.

Et i o casi soéçante-uit-millon ed frinchoés, picards, bretons - et savoéyèrds -  mis din ch'cartchul, à vive in Frinche, Picardie, Bretanne et "grinde" Savoée mis ndin.

Don, ches savoéyèrds sont moinss ed deus pèr chint ed ches frinchoés.

Achteure, busons.

Edpi ièr, os avons trinte-uit minisses din ch'nouvieu gouvernémint, et au moinss deus savoéyèrds. Puss ed chonc pèr chint ed ches minisses sont savoéyèrds !

Qu'is sont ureus, ches savoéyèrds !

Aprè, l'est possibe eq din quèks jour, cho cange granmint.

Boin diminche.

Puss j'avinche

... in voéture, et puss j'os d'essinche din ch'réservoèr.

Que m'dit ech cartchulateu d'em'voéture. Don, qu'i sanne.

!!!

L'eute jour, j'os étè obligé ed m'arter, ayant l'freusse que chl'essinche déborde et qu'i o adon du gadrouillage.

Pour éviter eq cho arrive, ej pux rouler in mèrche arrière.

Qué monne !

Boinne jornée.

Ches moinss et ches puss

Din un live qu'ej sus in route à lire :

"Chi l'tchalité dech moinss est d'ête puss grind que ch'puss qu'os avons achteure, adon ch'moinss compinsero ches eures pénibes dò qu'ej t'os vu souffrir au mitan ed ches gins-lò, et ch'moinss définiro pèr s'canger in puss. Ch'moinss, in vrai, sro un puss."

Ch'est à in perde chin picard.

Boinne jornée.

Ches kilomètes à bichyclète

Verdi au vèpe ed l'eute smangne, in rintrant ed vagances, j'arte pour prinde un bieu clitché (qu'i m'sanne), ej l'invoé pèr internénet à un cousin in i disant qu'ej sus in route à rintrer à m'moaison, et i m'répond :

- "T'es à bichyclète ! Cho foait granmint ed kilomètes (pour rintrer à t'moaison, qu'il écrit mie mais qu'i pense)".

- "A piés o bin in voéture, j'os casi ches minmes kilomètes."

J'ainme ches cacouilles. Et foaire des clitchés.

Bec à tertous.

Unne jonne fanme abonmine ches vius

Qu'i sanne !

I o moinss ed sis eures, ch'Présidint frinchoés truvoe infin un premier minisse qui, il l'espère, sro mie rinvoéyé in deus jours, et deus eures aprè, unne jonne fanme qu'est in Irlande, in puss et achteure, dit qu'echt onme est fin viu pour ête minisse.

Ch'est djò fin malaisié ed foaire plaisi à chs frinchoés, adon, chi in puss i feut acouter ches horzainnes.

Vivons muché !

Edpi dis jours

... ej sus autorisé à conduire une voéture.

Qu'i sanne !

Ej vos conte.

I o queks jours, j'os inmné unne gin in voiture avuc mi ; ej conduisoais.

Aprè tchinze mètres :

- "Atincion à main gueuche ! I o des voétures qui, des keups, arrive'te fin rade din l'tiote rue."

Aprè vint mètres :

- "Méfie-té ! I o des galibiés.

Aprè trinte-troés mètres :

- "T'os vu chti-lò ! Ralinti !"

Pi :

- "Torne à main gueuche pi à main droéte." (fuchons honnête, ej savoais mie)

- "Suis el direction-lò."

Lò, j'i o dit qu'ej savoais lire ches panneaux.

Pi os avons continué et arrivé, chin problinme.

Casi. D'un keup :

- "Rbée chtol-lò qu'o chin bros qui passe par ch'fernêtre d'es voéture ! Chi il o un accidint, i perd chin bros."

Pour ches gins qui li'te cho et qui m'connoaisse'te mie granmint, ej vos informe eq cho fro béto quarante-quat ins qu'ej pux conduire unne voéture.

Boinne jornée, et fuchez prudints.

Mes tiots-fius is sai'te

L'eute smangne, durant quèks jours, em fanme et mi avons pèrti in vagances.

Vu qu'os avons des glinnes, os dmindons à un voésin chi i vut bin s'in otchuper - i dit "ouais !" - et os i disons qu'i put étou, chi i vut, tcheuillir et matcher ches framboéses qu'os avons din no'gardin et qu'is vont meurir durant qu'os srons mie lò.

Verdi au vèpe, os rintrons à no'moaison, et sinmdi d'ervant-nonne, ej vos vir nos glinnes - autchun problinme - et ches framboéses.

Surprinze : i n'o granmint à tcheuillir (sis-chint granmes). Seur eq ch'est moinss eq vint-quat tchilos nu-chint-dis granmes ed tomates, mais framboéses et tomates font mie ch'minme tchilo.

A croère eq no'voésin ainme mie cho, o bin ls'o mie truvoé.

Mes tiots-fius, eux, is sai'te.

Boinne jornée, et merchi à min voésin*.

*Edpi eq j'os kminché à écrire chl'article, j'os apprins qu'il avoait truvoé - et ainmé - ches framboéses.

Din un reuve

Ej croése unne fanme qu'ej connoais mie mais j'i dis bojour.

Ale répond :

- "Bojour. Os êtes conme un solé."

Ch'est bieu, mais ch'est un reuve.

Boin sinmdi à tertout.

Pu rin

 - "Ej vux pu rin du toute".

Qu'ale dit unne gin qui viusit et qu'éro, din quèks innées, chint ins d'âge.

Ale o invie ed rin, et sanne prépèrer s'mort ; ale baille des coses qu'ale o à des gins qu'ale ainme.

Unne canche qu'os avons : ale o mie dvenu nikdouille et os pouvons bin dviser avuc.

Anmour et mériage

L'Anmour, ch'est conme un éclair ed leumière

El mériage, ch'est poaiyer l'facture dechl'éctricité.

Busez, et boinne jornée.

J'ainme Moreu

Jou qu'os connoaissez ch'bieu village del Sonme qui s'lonme Moreu, à vint kilomètes d'Anmyin, soéçante-dis d'Advile o Sin kintin, et chincante ed Compiènes ?

Nan ! Ej vos vos l'présinter in quèks lines.

Moreu !?

J'ainme quanq os arrivons, edpi Bofe et aprè avir torné à main droéte à Bérteucourt o Teinne, in passant à côté ed Casté dò qu'i o chl'Ave qui coule et unne fin bèle et crosse cinse din ch'fin tiot village.

In arrivant à Moreu, os avez, à main gueuche, un garage à voétures dò eq min frère o servi ed l'essinche durant un étè à ches gins qu'in vouloai'te pour leu voéture.

Pi os passez dvant él station à main droéte dò qu'i avoait ches trains à Tante'Lène.

Aprè, ch'keup-chi, à main gueuche, i o ech chinmetiére et min père, mes soeurs, eds onkes et mes taïons et taïonnes, pi, aprè, l'rue Sinte Beuve.

Coèr aprè, mettons, quat-chint mètes, i o, à main droéte, l'rue Bébert Gabry dò qu'i avoait un cros handjér pour ches tracteus et dò qu'i o achteure des pitchoères et eutes tchinététérapeutes.

Avinchons !

Os sonmes achteure chu l'grinde plache dò qu'i o l'mérrie, chl'église Sin-Vaast (j'ainme granmint chl'église, avuc, ndan, unne tiote mèrche rimplaché pèr unne rampe in bo, et surtoute ed fin boins canteus), unne boinne crémerie, l'boutike à Chasténier et d'eutes boutikes.

Drière chl'église, i o unne salle pour juer ach ping pong ed ches chinoés ; i o quèks innées, i avoait un jonne alintour ed quarante ins d'âges qui juoait conme ches frères Lebrun d'achteure. Qu'i m'sanne, mais p't'ête qu'ej dis unne berleure.

A pèrtir del plache, os pouvez pèrtir vers Morisi et Ailly, o vers Hangi. In voéture, autchun problinme din ches deus cas. A bicyclète, feut miu aller vers Morisi, cho deschind*. Qu'i m'sanne.

Mais allons vers Hangi. Os tchittez l'plache, tornez à main gueuche din l'rue dech uit dech moés d'eu mile-nu-chint-dis-uit**. Lò, os truverez ches fux pi os arriverez din ches cans. Ches bieus cans, lò dò eq ches cinsiers font pousser ches blés, ches punmes-ed-tère et, ch'est nouvieu, eds éoliènes.

Arrivés in heut, os vos rtornez et os pouvez admirer Moreu.

Merchi ed m'avir suivi. Chi i in o pèrmi vos qu'ont mie rconnu ch'village, feut mé l'dire.

Bec à tertous, surtoute chi os m'connaissez et qu'os restez à Moreu.

Et boin sinmdi. Surtout chi os êtes à Moreu innui.

Rin à vir : Barbara cantoait "I pleut chu Nintes", et ale avait raison.

* mais cho montero aprè. Qu'i m'sanne coèr.

** durant granmint eds innées, j'o cru qu'ale étoait ed mile-nu-chint-quarante-chonc.

Ches coses qui ser'te à rin

- "I suffiroait eq ches gins is' art'te d'acater ches coses qui ser'te à rin pour qu'is s'vinde'te mie."

Qu'o dit unne gin célèbe.

Inlvez vo'brin vos-minme

..., qui dit, des keups, un onke.

Innui, ej m'o déjoutché in ayant invie ed braire. Cho put arriver à tertout.

Din qué monne qu'ej vis ?

Début juillet, j'os allé voter. Conme toudi à chake keup qu'i avoait un votage, edpi mile-nu-chint-quater-vint-un. A chl'époke, ch'étoait pour ch'présidint.

Achteure, j'arte d'aller voter. Innui, dman et coèr aprè. Minme put dzoin qu'os m'disons pour qui qu'éj doés voter o mie voter adon qu'os savez mie pour qui qu'ej votoais

Put eq mantcher, din troés ins, ej connoais ch'résultat.

Nos voésins berges, is sont berges, ches inglés, is sont inglés, et ches frinchoés sai'te foaire qu'unne cose, dire nan. 

- "Tu vux q"

- "Nan"

- "J'avoais mie défini ed causer !"

Ems éfants m'ont explitché une cose : ch'déclassemint.

Ech déclassemint, ch'est quanq ches gins ont l'freusse ed vive moinss bin qu'avant, d'avir moinss d'avantages, ed perde in tchalité ed vie.

Cho esplitcheroait qu'is vot'te conme is vot'te ed puss in puss, pour ches estrèmes.

Qué brin ! Qu'i feudroait inlver.

Mi, ej vos inlver chti qu'est din min nez.

Boinne jornée.