Ech cot artificiel

Ches cots artificiels, os in truvoez ed puss in puss chu internénet. Ch'o un lien avuc ech gingin artificiel qu'ej vos in o causé i o quèks jours.

Ches cots artificiels, os les voéyez d'un keup chu internénet quanq is pense'te qu'os avez dzoin d'un keup ed main pour rimplir unne déclération.

I o quèks smangnes, j'in o un qu'o apéru quanq j'étoais chu internénet.

Ej vos conte.

-" Bojour, ej su lò pour vos aidier. Jou qu'os avez unne tchestion ?"

-" Bojour ch'bétail, ouais, j'o unne tchestion : kmint qu'ej foais pour valider ém déclération ?"

-" J'o mie comprins vot tchestion ; jou qu'os pouvez rkmincher ?"

-" Ouais ! Ej trache un bouton pour définir em déclération."

-" J'o mie comprins vot tchestion ; os pouvez contacter unne gin pèr messagerie."

Adon, j'o invoéyé un message à unne gin, in i posant mes tchestions et in i disant eq chin cot avoait mie ed gingin.

El gin o bin répondu à mes tchestions, mais ej sais mie quoé qu'il o foait dech cot.

Boinne jornée.

Ech poéyisan et ches troés fanmes

Din un tiot village ed Picardie, i avoait un poéyisan qu'avoait troés fanmes.

 

Un jour, unne gin i dminde pourquoé.

Echt'onme répond :

- "Unne fanme, ch'est mie assez. Deus, is s'chipouilloai'te toudi. Adon, j'in o prins unne troésienme pour els impêtcher de s'chipouiller".

Ech gingin artificiel

Ches jornaleus nos in cause'te ed puss in puss, dech gingin artificiel.

Ch'est quoé, ech gingin artificiel ?

Mi, ej diroais eq ch'est quanq ches ordinatures rimplache'te ches onmes ; ch'o djò bin kminché, chu internénet, din des voétures, pèr eximpe, et des keups, os s'dmindons chi i o mie du dinger à développer ech gingin artificiel qui, un jour, nos diro p't'ête eq ch'est li qui déchide ed nos vies.

Mi, ej térintoais, mais edpi sinmdi apré nonne, ej sus pour.

Kmint eq cho s'foait ?

Sinmdi, j'o tondu min gardin, et vu ches timpératures à l'cour, j'éroais ainmé qu'un manicraque foaiche cho chi mi.

Don, chi os avez du gingin humain, merchi ed buser pour m'fabritcher un manicraque qu'éro du gingin pour tonde seu. Cho m'fro granmint plaisi.

A béto !

Ches mawais et ches méchants

Un grind poète frinchoais o dit un jour :

" Ems amis, rténez cho ! I o mie ed mawaises erbes et mie ed mawais onmes. I o qu'ed méchants cinsiers."

Os ainmez ?

Mi, ouais. Et granmint.

Boinne jornée à tertous.

Un tiot onme vert est mort

Jou qu'os croéyez à ches tiots onmes verts ?

Eh bin, is exist'te !

Ch'est eds onmes qui juoai'te ach fotbal din ches innées mile-nu-chint-soéçante, mile-nu chint-quater-vint et qu'avoai'te un maillot vert.

 

Echl'étchipe étoait à Sin Etienne, din ch'dépèrtémint del Loère.

Pèrmi ches jueus, i in avoait des grinds, et i in avoait des tiots.

Ièr, ch'est un tiot, George Bereta, qu'est mort.

Ej sus un molet trisse ; ch'étoait un fin boin jueu ed fotbal.

Adé, ch'tiot !

Dò qu'is vive'te ches picards

Ej m'o posé l'tchestion in voéyant ech nombe ed gins qui lise'te ems articles.

Eh bin ! Des picards, i in o pèrtoute din ch'monne .

Rbéyez !

In Frinche, os s'in doutons.

Nos voésins et cousins picards ches berges, sont p't'ête din "eute".

Mais à Singapour, ch'est pour mi unne vraie crosse surprinze.

Continuez à lire ches articles,

Boinne jornée.

Deus-chint-miles

Din quèks smangnes, in sectimbe, cho fro dis ins qu'ej vos écris.

Innui, ej sus ureus ed vos dire eq din quèks jours, j'éro ieu puss ed deus-chint-mile gins qu'éront un jour lu ems articles. 

Durant ech moés ed juin, os avez étè puss ed chonc-miles (casi sis-miles).

Ej sus granmint ureus, et fiér.

Grin merchi à tertous, continuons. 

 

Pourquoé courir

Lò in dsou, os truvoerez une boinne espression d'un sage :

 

- "Chi él canche est avuc ti, pourquoé courir ?

Et chi él canche est mie avuc ti, pourquoé courir ?"

 

Pourquoé courir ? N'in vlò unne boinne tchestion !

Ech premier onme avuc qui j'o ouvré étoait un "viu" pér rapport à mi et disoait à ches gins :

- "Os avons tertous ch'minme tans, mais os l'utilisons mie del minme manière." 

Busons chu quoé qu'os foaisons ed no'vie.

Boinne jornée.

 

Des vakes meur'te

... din ch'dépèrtémint dech Cantal, à coeuse eds ches hernus.

Ej viens d'apprinde cho chu internénet.

Vint-troés vakes d'un keup sont mortes !

Jou qu'os savez ch'est quoé unne vake ?

Seuremint !

Jou qu'os connoaissez ech fin bieu dépèrtémint dech Cantal, minme chi 'l'est un molet moinss eq l'Aveyron, chin voésin ?

Ech Cantal, ch'est lò dò qu'ém fanme, ems éfants, mes bieus-fius et bèle fille, mes tiots-éfants et mi pèrtons bétò in vagances.

!

Ej vos in causero, 'p't'ête, chi ej sus toudi in vie après.

Min tchyin est sésquisse

Edpi deus ins, m'fanme et mi avons un tchyin à no'moaison.

Et mi, edpi quèks tans, i m'sanne eq min tchyin est sésquisse.

Conme à chake keup qu'ej vos écris des coses mie croéyabes, ej m'in vos vos espliquer.

Adon, ej vos esplique achteure.

Quanq ej mé déjoutche fin timpe au matin, per eximpe pour aller prinde un train et aller ouvrer, min tchyin dors et n'bouge mie.

Mais chi ém fanme s'déjoutche, adon lò, min tchyin étou s'déjoutche et viens vir m'fanme.

Os comprindez achteure quanq ej dis eq min tchyin sanne ête sésquisse ?

Et vos ! Jou qu'os avez étou des bétails à vo'moaison et jou qu'os avez constaté l'minme cose ?

Disez-mi avuc un tiot conmintaire.

Boinne jornée à tertous.

Conme ech nez au mitan del fidjure

Seuremint qu'os connoaissez echl'espression pour dire ed quèk cose eq ch'est évidint o fin aisié à vir.

Vo'nez est au mitan ed vo'fidjure, inter vos deus éreilles et au dsu ed vot bouke.

Ch'est unne évidinche.

Adon, ej croés qu'i o mie dzoin ed mette o laicier un point noèrt dsu vo'nez pour qu'os l'voéyonche miu, vu qu'os savons tertous qu'il est au mitan ed vo'fidjure.

Boinne jornée.

Un grin espoèr

L'eute jour, pour aidier des gins à prépérer ech batinme* ed leu fiu, ej leu dimindoais d'ém dire troés mots pour espliquer pourquoé qu'is vouloai'te foaire batiser ch'galibié.

Is m'di'te :

- "Anmour, vu qu'os ainmons not'fiu,"

- "Responsabilité, vu qu'os sonmes ches pérints ed not fiu et qu'os prindons unne décison pour li,"

- "Sint-Esprit"**.

' "?!?!?!" qu'ej pense.

Et ches deus pérints ajout'te :

- "vu qu'os espérons qu'i éro pu ed tcheurelles din nos familles."

Cho m'o granmint surprins. Mais j'espère pour eux qu'is front unne bèle fête ach batinme dech tiot, chin tcheurelles.

Boin diminche. Ed Pintcoute.

*Ej vos o mie précisé, mais ej cause ed batinme din unne église, mie à l'merrie d'un village, vu qu'ech mot "batinme" vut dire plontcher (din l'ieu). 

Quanq eq des gins di'te foaire un batinme in foaisant unne seurte ed chérémonie à l'merrie, i o mie d'ieu et don, mie ed plontcher ndan. Ch'est don mie un batinme. 

Et vlan !

** Vu qu'os sonmes innui el Pintcoute et qu'os fêtons l'venue dech Sint-Esprit chu ches apôtes ed Jésus, ch'est pour cho qu'ej vos o écrit echl'article.

Attinde

 D'unne vieille fanme ed quater-vint-dis ins d'âge, qu'est unne ed mes tantes, à unne eute fanme, qu'est ém mère :

- "Achteure, nos ches vius, os avons pu qu'unne cose à foaire : attinde ."

Busons !

Bec à tertous et boin dimanche. 

Ale o gaingné à l'tireloterie

Des tireloteries, j'in connoais ed deus seurtes :

- El tireloterie del Frinchoése ed ches jus, qu'os poéyez pour juer sis nombes chu unne grille et qu'os gaingné casi jonmoais,

- Ches tireloteries ordjanisés pèr eds achuchons pour leu foaire gaingner quèks seus, manière qu'is ordjanise'te après des voéyages o bin qu'is intertienche'te ches monumints, pèr eximpe. Ches gins qui ju'te peu'te gaingner ed toute : un voéyage, un rpas, un ordinature, unne plante in pot, unne dréche, unne pindule, unne érlaveuse, ... et des keups, rin.

L'eute jour, unne jonne fanme qu'ej connoais o jué àl tireloterie ed l'école ed chin fiu. Et ale o gaingné ! Unne keupe ed cavieus pour onme. Fin bin ! Mettons eq cho i rimborse és pérticipation àl tireloterie.

Mais l'fanme l'o un problinme : chin onme s'rase li-minme ches fin tiots cavieus casi tous les jours ; i n'o mie dzoin d'aller amon ch'coéffeu.

Adon, él fanme o foait plaisi à un eute onme. Qui reste mie loin, pour pouvoèr profiter del keupe ed cavieus.

Quanq ej pense qu'i o eds onmes qui poéye'te pour mette des cavieus chu leu tête !

Boinne jornée.

Ech Roé yon

Os avez seuremint vu un jour, tout seu o bin avuc eds éfants o tiots-éfants, ech dessin animé lonmé Ech Roé yon, créé in mile-nu-chint-quater-vint-quatore.

Pour résumer, ch'est ches aüres d'un tiot yon lonmé Simba, fiu dech roé ed ches yons d'Afrike, qui nait, in Afrike, et qui doét dvenir roé quanq chin père moériro.

Eh bin, i o quèks tans, in allant in Bretanne quèks jours, j'o comprins qu'echti qu'avoait invinté ech film étoait breton. Minme chi i vit p't'ête (avuc internénet et achteure ech télé-ouvrage, toute est possibe, don, ch'est poin seur qu'il i reste) in Anmérike dò qu'il ouve.

Ej vos esplique kmint eq j'o dviné cho.

In premier, din ch'film, ech tiot Simba o un onke lonmé Scar, onke qui ainmeroait bin dvenir roé àl place ed chin nveu. Scar, cho rsanne à Scaer, ville ed Bretanne, din ch'dépèrtemint dech Beu-ed-ches-tères.

In deuze, i o ch'phacochère, grind ami dech tiot yon. Pour mi, ch'bétail o été mis din ch'film vu eq li, i rsanne à un coéchon. Et in Bretanne, des coéchons, i n'o granmint.

Aprè, i o un momint din ch'film dò qu'os voéyons des yènes, conmorades de Scar, qui sont din un indroét dò qu'i o des buissons avuc eds épines. Conme ches ajoncs qu'i o in Bretanne !

Vu tout cho, jé m'dis étou qu'un début ed film, quanq ech tiot yon est présinté à tous ches bétails d'Afrike edpi unne tiote montaingne, ch'est un clin d'ziu dech breton pour foaire penser à ches Monts d'Arrée.

Ch'est toute pour innui.

Troés coses avant ed définir chl'article :

- chi os avez mie vu ch'film, feut vos débrouiller pour l'vir,

- chi os connoaissez mie l'Bretanne, feut i aller.

- n'obliez mie qu'os avez l'droét d'ém dire quoé qu'os pensez ed min article.

Boinne jornée à tertous.