Cangemint d'eure

Pour vos, jou qu'il étoait puss aisié de s'déjoutcher innnui unne eure avant pèr rapport à sinmdi, fin timpe au matin, que de s'joutcher unne eure in avinche, ièr au vèpe ?

Pour mi, poin ed cangemint d'eure ; i o del pleuve et mie ed solé.

Boin diminche à tertous.

Pértchinson et Alzémèr

J'écris Pértchinson et Alzémèr, mais i feudroait miu écrire ech Mau ed Pértchinson et ch'Mau d'Alzémèr.

Os disons malureusemint qu'unne gin, l'pauve, o hapé Pértchinson o Alzémer. In vrai, ale o hapé ch'Mau ed Pértchinson o ch'Mau d'Alzémèr.

Pértchinson et Alzémèr ont mie vétchu insanne et din ches minmes innées, mais ches deus onmes ont traché, durant leu vie, à comprinde ches problinmes dech cervieu qui foait perde leu tête à ches gins adon qu'ale coèr chu leus épeuilles. Et z'ont apprinds quèks coses pisq z'ont baillé leu nom à des maux.

Ches deus maus sé rsanne'te et ont rin ed régalant. 

J'esplique.

Ech premier, ch'Mau ed Pértchinson, i sanne qu'os dvenez conme un lédjume. Minme quanq os avez seulemint soéçante ins. 

Eximpe. I o béto quat ins, m'fanme et mi étoème à un rpas ed mériage assis à unne tabe dò qu'unne eute fanme étoait étou, mais ale o rin dit, et s'voésine ed tabe s'otchupoait del foaire minger. Ale avoait un molet puss ed soéçante d'âge et achteure, ale est din unne moaison éspécialisée, conme un ôpital.

Un eute eximpe, ch'est avuc min témoin ed mériage. Déchidémint, ches mériages !! Ej l'avoais mie vu edpi vint ins au moinss et un jour, jé l'croése pèr hasèrd, lé rconnoais et os causons quèks minutes. Quèks smangnes aprè, j'érchoés un message d'inviron dis lines qu'i m'o écrit chu internénet. In quèks smangnes !

I m'esplique qu'il o ch'mau ed Pértchinson, edpi dis ins, don, edpi qu'il o ieu chincante ins d'âge, et qu'achteure, il i feut granmint ed tans pour s'ramintuvoer ed quèk cose, pour écrire. Cho foait granmint ed mau au tcheur ed lire cho et comprinde qu'i vo dispèroaite.

Dispéroaite ! Ches deus gins prins in eximpe sont mie morts, mais sont conme des lédjumes ; is bouge'te casi pu o bin n'cause'te pu. Ch'est vraimint trisse. Pour ches eutes.

Avuc ch'deusienme mau, chti d'Alzémer, os dvenez un vrai cros nikdouille qui sait pu quoé qu'i foait et qui put dvenir granmint mawais, méchant, minme avuc des gins qu'il o granmint ainmé durant s'vie d'avant.

Pour avir connu unne gin qu'avoait hapé Alzémèr, ch'est granmint trisse étou ed vir quoé qu'il o dvenu in un molet d'innées.

J'espère eq vos et ches gins qu'ainmez srez protégés ed ches deus maus lò qui peu'te berziller unne famille.

Prions pour cho.

Deus gasètes

Combin ed familles in Frinche écri'te din unne gasète pour leu famille ? 

 

J'in sais rin du toute.

 

Eute tchestion, coèr puss complitchée : combin ed familles écri'te deus gasètes pour leu famille ?

 

Minme réponse, j'in sais rin. Mais ej sais eq cho existe.

Os pouvez, pèr eximpe, avir unne gasète écri'te pèr troés o quat gins del famille, mettons chake moés, et unne écri'te, mettons, un keup pèr innée, pèr tous ches gins del famille qu'in ont invie, minme ches troés o quat ed l'eute gasète. Fuchons mie racisses !

 

Mettons !

 

Os pouvons croère qu'i o mie ed problinme, vu eq ches deus gasètes sont différintes.

Din l'première gasète, crée alintour d'i o deus ins, ches gins cause'te et met'te des clitchés ed leus éfants qu'ont ieu leus âges, qu'ont gaingné ach fotbal o qu'ont allé DisneyPoaiyis o coèr, in route à matcher des chukeries.

Din l'eute gasète, créée i o miu ed vint-chonc ins, à mzure eq ches gins viusi'te, ch'est puss ed articles qui cont'te un point ed vue o qui cause'te ed quèk cose ed nouvieu, conme pèr eximpe, des papars ed l'innée, ech gingin artificiel qu'ont achteure eds ordinatures o coèr, des bieus phénomènes ed société.  I put étou i avir des dessins foaits pèr eds éfants o unne nouvèle fille qui vo s'mérier et qui s'présinte às nouvèle famille. On causons casi ed toute casi conme os voulons.

Os pouvons croère qu'i o mie ed problinme, mais pour mi, cht'innée, i in o un : ches troés o quat gins qu'écri'te din l'première gasète ont mie ieu l'tans d'écrire din l'deusienme. Z'avoai'te, conme ches eutes, un moés pour écrire quèks lignes o dessiner, et z'ont rin écrit o dessiné.

Donmage ! Ej su trisse, pour l'famille et ches gasètes, et un molet in prousse.

 

J'espère qu'in déchimbe cho éro cangé.

 

Boinne jornée.

Poéyer à rin foaire

Innui, ej sus àm'moaison, poéyer pour rin foaire.

In vrai, ej sus poéyé pèr unne gin qui vut qu'ej foaiche grève pour li, piq i put mie l'foaire li-minme.

Cho surprind, mais ej vos mi habituer.

Boin mardi.

Des moukes in ivèr

Maginez !

 

Din unne moaison, unne fanme est mer-nud et unne gin arrive. Feut qu'ale s'seuve. Et ale s'seuve. In infilant és boaiyète et in inmnant ches eutes vetemints.

 

A l'cour, in courant, ale dit à un onme qu'est avuc ale :

 

- "J'o mie ieu l'tans ed mette ém tchulotte !"

 

Et l'eute d'i réponde :

 

- "T'es mie obligée ed mette unne tchulotte, vu qu'in ivèr, i o mie ed mouke."

 

D'après ch'film "Tnue ed soérée" vu ièr au vèpe.

Ches tiots mouchoèrs

Il existe unne canchon chu ches tiots papiers, et un film chu ches tiots mouchoèrs.

Innui, mi, ej causerai d'un tiot mouchoèr qui m'pose un sapré problinme : ch'est un mouchoèr in tissus eq j'o truvoé din l'poke d'unne vieille casake qu'ej mets granmint ed keups, pèr eximpe pour foufter à l'cour o keuper du bos.

Pèrmi mes problinmes, seuchez eq ches mouchoèrs in tissus, à m'moaison, os avons pu edpi eds innées.

In puss, i sanne eq ch'est un mouchoèr ed fanme o d'fille, vu s'taille. Ureusemint eq ch'est mie unne tchulote eq j'o démuché din m'poke ! Et ureusemint qu'ém fanme o fiat.

A qui-jou qu'il appèrtient ?

Chi unne gin l'sait, qu'ale mé l'diche. Et chi ch'mouchoèr i li appèrtient, j'i rindrai, prope.

Boinne journée.

Causez conme i feut

Unne bèle-soeur, fanme d'un ed mes frères, s'otchupe ed ches vius qui res'te din l'ouest del Sonme.

 

Et vu ech nombe ed vius qu'i o, ale o des gins qu'ouve'te avuc ale, et pour l'aidier, os comprindez. Is doé'te don i obéïr.

 

Pèrmi ches gins-lò, i o unne fanme à qui ém bèle-soeur o apprins à dire, quanq ale rinte din chin burieu, "Bojour, Mdame D*."

 

El fanme, l'o bin comprins. Achteure, quanq ale arrive, ale dit à m'bèle-soeur :

 

- "Bojour Mdame D." Cho, ale o comprins.

 

Pi ale ajoute :

- "Ch'est ch'brin din ch'gardin".

 

Pour dire qu'i o granmint ed désorde din ch'burieu d'ém bèle-soeur.

 

I sanne qu'ém bèle-soeur, ale éro toudi edl'ouvrage** avuc ches vius, et avuc és collègue.

Boinne jornée à tertous.

 

*D : ch'est conme mi, don, ej muche.

** Chin causer ed ches tiots-éfants qu'arrive'te cht'innée et de chti qu'ale o djò.

Unne bèle phrase

Din ch'live "Et quèks keups j'o conme unne grinde idée"- ej vos in o causé i o quèks tans - il est écrit, à l'première page ed l'introduction:

- "El vie est foaite ed gins qui voé'te, qui cause'te et qui pinse'te ; chin quoé, ale est rin."

Busez !

Conme ej vos l'avoais écrit, j'o mie ieu dzoin ed lire granmint ed pages pour ainmer ch'live.

A suive, et à béto !

Unne saprée comète

Min pu jonne frère ainme rbéïer ches étoéles. Et ches planètes et ches éspoutnikes. Et des keups, quanq il o granmint ed canche, un cailleu d'étoéle, unne figée d'étoéle, o bin unne comète.

 

Feut l'intinde causer !

 

- "Min frère, lò, t'os chl'Etoéle dech bértcher pi Marche, des planètes, pi lò, Ches Pléïades, pi lò, Syriuche, él Nébuleuse d'Orion, l'Grinde Orse pi l'Tiote,...".

I n'in connoait granmint. 

 

Syriuche, à main gueuche, et Orion

 

Este smangne, l'o vnu in vagances avuc és fanme, des vêtemints, et unne paire ed jumelles, pour rbéïer ches tans et ches étoèles et toutes ches eutes coses présintes lò-heut.

 

Et il o ieu del canche : i avoait, in début d'és smangne, unne comète eq li et mi avons bin vu. Durant troés nuits. Ureusemint ! Car ch'prochain keup qu'ale rviendro, l'comète, ch'est din chincante-mille ins.

Mi, j'o étou apprins qu'i avoait unne étoéle qui lonmoait Aldébaran. Casi qu'on diroait eq chin tiot nom i o étè baillé pèr deus gins qui buvoai'te un keup à l'santé ed leus pérints et qu'on dit "A tes pérints".

A mzure eq ches gins o conté cho, ch'o dvenu ch'tiot nom d'achteure.

P't'ête ! Mettons.

Disez-mi chi os ainmez étou rbéïer ches étoéles, chi os avez vu l'comète l'eute jour. Quanq os savons qu'ale mzure tchinze millons ed kilomètes, os avez du l'aperchuvoèr.

Bec à tertous, et grind merchi à min frère et m'bèle-soeur d'avir évnu nos vir.

 

Ches gins dech Nord

Ches gins dech Nord

Ont din leus ius ech bleu

Qui manque à leu décor

Ches gins dech Nord

Ont din leu tcheur ech solé

Qu'is ont mie à l'cour

Ches gins dech Nord

Ouve'te toudi leus uis

A ceusses qui ont souffert.

Ch'est bieu d'intinde cho ! Ch'est poin ed mi, fuchons hônnete, mais ch'est vrai, et j'ainme.

Boinne jornée à tertous, surtoute à ches gins dech Nord. Eq j'ainme.

Récompèrons deus canchons

Innui, ej vos propose ed récompèrer deus canchons qui s'rsanne'te ; unne est bretonne, l'eute, tchébécoèse.

Kminchons pèr ches tites : l'canchon bretonne s'lonme "Ches prisons ed Nintes", Nintes étant in Bretanne, et l'canchon tchébécoèse o pour tite "El prison ed Londes", Londes étant in Inglétère, mie au Tchébec. Don, os pourroème comprinde qu'à Nintes i o des prisons, et à Londes, unne seule. A vir !

Ches histoères sont casi ches minmes : unne gin est in prison, à Nintes o bin à Londes, slon chti qui cante, et ale rchut mie granmint ed visites. A pèrte l'fille ed chin wardeu.

Lò, ej baille un boin point à ches tchébécoès :p unne gin, ale est din unne prison, et mie din des prisons.

Un jour, i dminde à l'jonne quoé qu'os disons ed li in ville et ale i répond qui vo ête pindu. "Brin !" qu'i pense seuremint, mais qu'i dit mie. 

- "Adon, chin vos kmindez, déliez-mi mes piés" qu'il i dit.

Et ale obéit.

Et ch'est lò eq cho dvient drôle quanq os récompérons ches deus canchons :

- din l'version bretonne, ech prisonnié seute din l'ieu, la Loère, et s'seuve. Pi, i s'met à canter eq chi i rvient à Nintes, i mèriero l'fille.

- din l'version tchébécoèse, ech prisonnié seute un keup din l'ieu, pi i seute un deusienme keup din l'ieu pi i s'seuve. Aprè, i cante étou eq chi i rvient, i mèriero l'fille.

Maginez et disez-mi ! Quanq os vos seuvez d'unne prison, jou qu'os i rtornez un keup pour rkmincher un deusienme keup à seuter din del'ieu pi vos seuvez ?

Chi os avez ainmé min article, os pouvez acouter ches canchons chu internénèt.

Boinne jornée à tertous.

Em'famille sroait un clan

I o quèks tans, in dvisant avuc unne gin, vlò d'un keup qu'ale m'dit qu'ém famille rsanne à un clan.

Ej sus saprémint surprins, adon, j'i o dmindé pourquoé qu'i disoait cho.

- "Quanq os vos voéyez, os restez insanne, os causez insanne, os juez insanne. Pèr eximpe, à cartes. Os diroème qu'os êtes conme un clan."

J'o busé quèks sgondes pi j'i o répondu :

- "Os pourroème penser cho, mais ch'est unne crosse berlure ; i o quèks moés, m'fanme et mi avons alé à unne fête amon un bieu-frère, bieu-frère qu'avoait invité ches soeurs, ches bieus-frères et ches bélès-soeurs, mais étou ches nveus et nièces, eds amis, et bin seur, és fanme et leus éfants.

Mie unne gin del famille eq tu causes achteure.

Croés-mi ! Quanq os avons mangé, à nonne, au vèpe o au matin, chatchune ed ches familles s'o assis avuc des gins d'és famille, fin ureus ed s'rtruvoer.

Don, ém'famille est mie un clan, mais ureuse d'és vir. Quanq ale put."

Et ch'est fin bieu qu'ho fuche conme cho.

Boinne jornée, cros bec à tertout.

Ej publie cho ech uit févrié deus-mile-vint-troés, jour ed ches âges del première soeur ed min père. Ale o quater-vint-dis ins innui et j'i foais un cros bec. Boinne jornée à m'tante qui vo truvoer des frères, soeurs, bieus-frères, bélès-soeurs durant quèks eures. Qu'ale fuche ureuse ed vive cho, in famille.

Et quèks keups

... j'o conme unne grinde idée.

Ch'est ech tite d'un live eq j'o acaté i o quèks smangnes et qu'ej sus in route à lire. Ech live o étè écrit pèr Ken Kesey, anméritchin qu'avoait étou écrit "Vol au dsu d'un nid ed coucou" ; cho vos dit quèk cose, cho ? I o ieu un fin boin film ed foait.

Pour rvénir à min live, j'o lu chl'introduction et quatore pages, chu uit-chint-quater-vint-quatore qu'i o, et j'o djò pu invie d'arter del lire.

Seur qu'os in causerons d'eutes keups.

Boinne jornée, et in févrié, mingez eds boinnés landimoles. Avuc chuke, castonnade o chucola.

Tchulture politike

Ièr, achl'assemblée nationale, pour débatte del réforme ed ches rtraites, un onme politike o dit :

- "Quanq os vos pichez dsus (comprindez, din vos maronnes), os avez janmoais keud granmint ed tans."

Cho, ch'est bieu. In vrai, in premier, cho étoait dit din un film lonmé "El nuit nos appèrtient", sorti in deus-mile-sèt.

Cho m'permet ed dire eq ches onmes et fanmes politikes ont del tchulture. Et ej sus ureus del savoèr. Et ed vir qu'is nos in font profiter.

Julia ém rataïonne

Julia, taïonne ed min père, est morte quanq j'avoais alintour ed sèse ins d'âges. Et ale, ale avoait alintour ed quater-vint-douse ins d'âge. J'l'o bin connu.

 

Man Julia, conme os disoème, avoait unne sapré mémoère. Jonmoais,  qu'i m'sanne, ale s'o berluré chu ches tiots noms ed ches arrières-éfants. 

 

Man Julia ainmoait tcheude et broder. Et pour cho, i falloait qu'ale acate du tissus, du filé et eds adjuiles.

Rbéïez in-dsou des coses qu'ale o foait et eq mes tiots-éfants peu'te coèr vir :

Ed fin bieus ouvrages, qu'ej truve.

Troés tiotés anecdotes :

L'première : 

In ivèr, un jour qu'ale étoait avuc m'mère, is ont été din unne merchérie ed Tchin-Plage pour acater du filé mauve. Em rataïonne o dischuté granmint ed tans avuc l'fanme qui vouloait i vinde.

D'un keup, ale sanne avir truvoer.

 

- "Combin qu'ho veut ?" dminde m'rataïonne.

- "Deus francs et soéçante tchinze chintinmes ech mète" répond l'fanme.

- "Quoé !" qu'ale s'esclame ém rataïonne, "à Moreu, ch'est deux francs et onze chintimes?"

Em rataïonne, et m'mère, ont sortie del boutike, chin rin acater.

El deusienme aüre :

Ch'étoait un jour eq Man Julia étoait à Anmyin avuc chin bieu-fiu, père ed min père, don un ed mes deus taïons, pour acater du tissus.

Durant granmint ed minutes, él vindeuse o présinté des tissus à Man Julia pour qu'ale puche coésir chtol-lò qui i plairo l'puss.

Minme ech patron del boutike o vnu aidier és vindeuse à vinde.

Et ch'jour-lò, Man Julia a acaté du tissu ; vint chintimètes.

Ej pux vos dire qu'ém mère s'in ramintuve bin ed tout cho. Ch'est pour cho eq j'o pu vos l'conter. Merchi à ti , ém mère eq j'ainme granmint.

Infin, l'troésienme anecdote :

Un jour eq Man Julia étaoit in voéture avuc s'fille et chin bieu-fiu, z'ont ieu un tiot accidint : l'voéture o tchitté l'keuchie.

Man Julia o dit :

- "Dò ch'est qu'os allons conme cho ?"

Din ch'fossé.

Vlò ! Ch'est toute pour ch'keup-chi. Chi i o des gins qu'ont étou eds anecdotes, mettez un tiot conmintaire.

Boinne jornée.