Smer ches grainnes

Cho sanne aisié dé smer ches grainnes, et ch'est vrai eq ch'est fin aisié : tu les mets dò eq tu vux, et vlò, tu els'os smé.

Mais aprè !

Feut qu'is jarne'te ! Et lò, cho kminche granmint à ête moinss évidint : ches cinsiers, un keup is di'te qu'i foait granmint froéd, un eute, i foait granmint keud, et coèr un eute, i o granmint trop d'ieu din ches cans. Et ches tiotés grainnes n'jarne'te poin.

Magine !

T'in sèmes un mile o deus, et tu n'os eq chincante o chint qui pousse'te ! Qué malur !

Coèr pire : t'in mets un millon, et tu n'os qu'unne o deux qui jarne'te. T'éroais casi invie ed moérir, détchoeuré. Mais i o des gins, in Afrike o eute pèrte, quanq qu'is voé'te cho, sont quanq minme ureux.

Prions pour eux.

Bec à tertous.

Echl'asseureu asseuré

Tertout l'sait : din l'vie, feut ête asseuré, et feut asseurer. Asseurer t'vie, chtol-lò det fanme et d'ets éfants, asseurer t'moaison ou chtolo-lò dò eq tu restes, asseurer t'voéture, asseurer ch'keup . Toudi feut asseurer.

Et pour asseurer, feut eds asseureus. Eq tu poéches.

Ches asseureus, is peu'te vnir ét'vir : quanq t'os un problinme, o avant, pour vir chi toute vo bin.

Eximpe, l'eute jour din un tiot village.

Echl'asseureus o vnu vir ches installations electrikes ed ches bâtimints qu'appèrtienche'te à ch'village et pour lestchels l'merrie s'in s'otchuppe'te et in est responsabe.

Pour bin contrôler, i o eds indroéts dò qu'echl'asseureu o prins unne étchèle, et o grimpé in heut.

Mais l'étchèle o tcheu. Et cht'onme qu'étoait dsu étou.

N'riez poin !

L'o mis ches mans dvant li pour n'poin s'foaire ed mau. Ches bros sont berzillés. Et chin minton o boaisé ch'carrelage.

Pauve asseureu ! Ej pense qu'i diro, quanq i pourro, qu'ech bâtimint est dingeureus.

Corage à li qu'est din un ôpital.

Qui-jou qu'éj su

A tertoute l’bèle troupe, mie d’intchiétude, 

Ej su mie unne cornaille. 

 

Mais qui-jou qu’éj su ? 

Avuc mie granmint ed mots. 

 

Achteure qu’éj vos écris, 

I n’o qui m’récompère à un poévron. 

Adon, disons qu’éj su un symbole ed l’étè et dech taboulé. 

 

Mais pour ête honnête, 

Ej sroais miu àl’Toussaint, 

Dò qu’ej mé fro poturon. 

 

Fabritchation àch poaiyis ed ches tsars et ed ches orses, 

Posé alintour d’un port del Grèce antike dò reingne’te ches mioles et ches rots. 

Jou qu’ej sroais del mafia ?? 

 

Allez ! Ej mé pertonne. 

Sortez cambernes, cado et tchubes in bos, vu eq béto, ej su lò !!  

 

 

Rassaner ches ocleus

Ech texe d'aprè o été écrit pèr unne fanme* fin aimabe din l'gasète ed ches cousins lonmée "Bojour ches cousins". Ej vos in o djò causé granmint ed keups, del gasète-lò.

L'fanme* écrit :

"Un tiot foait chin conséquinche, mais... ej vos l'conte. Din no'péroésse, os prépérons à deus o troés l'messe du diminche. J'étoais avuc Pépète** qui savoait patricher un ordinature, internénet, fin aisémint. 

Pépète** o pèrtie, ém vlò seule. El responsabe del péroésse m'propose ed truvoer unne eute gin o bin dé rjoinde unne eute étchipe. Ech puss aisié, pour mi, ch'est d'intégrer unne eute étchipe.

Etpi vlò ch'carême : prier, s’priver… . Et si cht’innée, ch’étoait buser à former unne nouvèle étchipe ? A m’voésine qui m’inmène ed tans in tans à l’messe, j’i pose l’tchestion.

- «Ej su mie capabe» qu’ale dit.

- «Et mi adon !»

Et vlò deus incapabes qui ont mis leu talent insanne et qui ont chl’impression ed s’in sortir. Miu, os avons truvoé unne troésienme qui vo s’joinde à nos et qui, ale, sait jougler avuc internénet."

Ej truvoe cho fin bieu, adon, j'avoais invie del pértager avuc vos.

Din l'gasète, i o un cousin qu'o ajouté un tiot commintère un molet conme cho :

"Quanq os mettons insanne des compétinches... os truvons des solutions à ches problinmes."

Tiote berlure dech cousin : ch'est poin des compétinches, ch'est eds ocleus. Mais ch'résultat est l'minme ; moinss pèr moinss, o puss pèr puss, cho foait puss.

L'fanme* : ch'est ém mère. Et ej su fièr d'èm mère.

Pépète** : ch'est poin chin vrai tiot nom, mais pèr respect pour l'fanme qu'o arté, j'l'o cangé.

 

Pour dévnir séruzyin

Ah ! Dévnir séruzyin ! I feut avir unne tête bin foaite, et avir granmint ed corage pour ches études.

J'esplique.

In Frinche, alintour eq t'os dis-uit ins d'âge et tin baccalauréat din t'poke, tu rintes, chi t'os invie et eq t'es accepté, in première innée d'études ed séruzyin. Granmint ed jonnes font deus keups leu première innée, pour aller aprè ... in première innée ed deusienme pi troésienme, quatrienme, chonquienme et infin, sisienme innée.

Chi ti, lecteu, t'os bin cartchulé, cho foait djò sèt ins eq t'apprins. et ch'est mie défini.

Slon eq tu vux dévnir spécialisse del tête, del panche, ed ches boéyeus, dech cervieu, del pieu o eute, t'os, aprè tout 'ho, troés, quat, chonc o p't'ête sis nouvèles innées. Avant dé kmincher à ouvrer tout seu conme un grind.

Cho, ch'est in Frinche. Ch'étoait in Frinche. Ch'o cangé in sectimbe deus-mile-vint. Ches troés premières innées ont cangé, mais pour définir, tout reste est l'minme : au moinss dis ins avant d'ouvrer.

In Frinche, quanq tu lis cho, t'es rassseuré.

Mais din ches eutes poaiyis ?

Din un poaiyis eq j'ainme granmint vu kmint ch'est fin bieu, i sanneroait eq ches séruzyins, is apprinde'te à keuper del vianne, conme un boucher.

Vétchu pèr unne gin eq j'ainme bin : t'os quèk cose à tin bros, din tin bro, et cho t'foait du mau. Eh bin ! Ech séruzyin-boucher - lonmons un cot un cot - i monte chu tin bro pour l'coincher pi tirer chu l'cose qu'est ndan. I i arrive, mais i o granmint ed sanke pèrtoute, et t'os toudi du mau à tin bro. Mais pour eute cose, achteure.

Ch'keup-chi, t'es coèr in vie. Mais tu t'dis qu'ech prochain keup, t'iros, chi tu pux, din un eute poaiyis. Eximpe, l'Frinche.

Cros bec à mes filles, in route à dévnir séruzyin o mie, à m'nièce et à l'fin boinne conmorade ed min fiu qu'is vu'te étou dévnir séruzyin. In Frinche.

Boinne jornée à tertous.

Un jornaleu ed fotbal

 A l'saison qu'os sonmes, durant quat smangnes, os pouvons causer fotbal. Conme ches jornaleus.

Ièr au matin, j'o acouté des jornaleus causer del rinconte inter l'étchipe ed Frinche et chtol-lò d'allemane, gaingnée pèr ches premiers din ch'poaiyis ed ches sgonds. I o un jornaleu frinchoés qui s'plaindoait qu'autchun jueu ed l'étchipe ed Frinche o mèrtché.

Et ouais ! os avons ieu del canche qu'un allemand pousse ech ballon din ch'méchant sins. Mais cho arrive.

Adon ! Vlò qu'achteure, quanq eq tu gaingnes, i feudroait eq cho fuche ti qui mèrque ches points ?!

L'étchipe ed fotbal d'Allemane, fuchons honnête, est unne fin boinne étchipe. Et tertoute n'gaingne mie in étant opposé acht'étchipe-lò. Surtoute in Allemane.

Don, jé dminde à ches jornaleus d'ête gintilles avuc ches frinchoés, et ed bin foaire leu ouvrage.

Minme chi j'ainme granmint leus berlures qui m'ont rire.

A béto ! Boinne jornée.

El boinne idée ed min cousin

Ed min cousin ! Ej dvroais écrire "un ed mes cousins". Vu eq j'in o alintour d'unne trintainne.

Don, un ed mes cousins o ieu unne boinne idée.

Ej vos conte.

Os savez qu'edpi eds innées, quanq os téléphonez, os pouvez laicier un message chu ch'téléphone d'èl gins qu'os trachez à joinde.

Ches gins qu'os assayez ed contacter, i n'o qui mette un tiot message qu'os intindez avant ed laicier vot'message.

 

Un eximpe qu'os avons granmint :

 

- "Os sonmes mie lò, mais laiciez-nos un message et os vos rtéléphonerons."

Bip ! Aprè.

Min cousin o ieu du gingin, pour canger et pour foaire rire. Vlò chin message d'atcheuil :

- "Bojour! Os sonmes mie lò, mais chi os voulez mie qu'os vos rappelons, laiciez un message avant ch'bip."

Avant ch'bip, os pouvons mie laicier ed message.

J'o ri. Et causé aprè ch'bip.

J'espère eq min cousin, s'fanme Zabèle, leus filles, surtoute chtol-lò qu'avoait ch'jour-lò ches âges, ont ieu min message et qu'is vont bin.

Bec à eux.

Un ainnieu in dor

 ... et d'anmour.

Os l'avez djò vu, quanq des gins s'ainme'te granmint, chatchun offe à l'eute, in pruve d'anmour, un ainnieu in dor pour eq l'eute l'mèche à leu doét.

Mes pérints, mes taïons ont foait cho avant m'fanme et mi.

Pèrmi mes taïons, l'mère d'èm mère avoait toudi chin ainnieu à chin doét aprè puss ed chincante ins ed mériage.

Ch'étoait bieu. Et normal.

Mais un jour, èm taïonne à ieu du mau. Et arrive quoé qui doét arriver, feut qu'ale voèche à l'ôpital.

Ale pèrte à chl'ôpital. Avuc chin ainnieu à un doét.

Ale tchitte chl'ôpital. Chin ainnieu.

P't'ête qu'un séruzyin avoait déchidé, din l'nuit, dè s'merrier et qu'il o ieu dzoin d'un ainnieu.

Malureusemint pour m'taïonne et s'famille.

Bec à tertous, et surtoute à m'mère et èms onkes et tantes.

Mawais pour nos

 ..., mawais pour ches eutes.

Bin nan  !

Prindez, pèr eximpe, echl'intraineu ed l'étchipe ed fotbal ed Chelsea, in Inglétère. Ièr au vèpe, sn'étchipe o gaingné unne grinde keupe d'Urope.

I o chonc moés, echl'étchipe ed Pèris l'o mis à cour, vu qu'il étoait, eq disoai'te ches dirigints pèrisiens, mawais.

Mi, j'mé dminde chi ch'est l'météo qu'o cangé cht'onme conme cho !?

Ch'est bieu, l'fotbal !

Boinne fête à tertoutes ches mères. Qu'is ainme'te o mie ch'fotbal.

Cause toudi

... , mais cause bin.

Et conme tu vux.

Innui, os défindons ches gins qui vu'te causons tranchillemint breton, baske, et surtoute, picard.

Rin à gaingner

Os avons rin à gaingner à inmerder ches gins qu'ont rin à perde.

Qu'o dit un écriveu.

'Ho sroait bin eq tertout comprinche cho.

Ches contervints sont frunmés

Cho foait quat moés eq ch'est conme cho ; edpi eq min voésin est mort. Chin tcheur qui butchoait o butché un cros keup pi s'o arté.

Ej m'i su mie habitué. A chake keup qu'ej passe dvant, j'espère qu'ej reuve et qu'i vo rvénir.

Mais rin !

L'est vraimint mort ! Qu'i sanne.

Ej su fin trisse, et toute est bzarre.

Mais ch'est conme ho.

Un vint du diabe

Innui diminche, i o granmint ed vint. Puss qu'ièr.

I in o tans et tans qu'ho pourroait foaire tchère ches cornes ed ches vakes. Pour ech diabe, os pouvons mie vir.

Ch'est pour cho eq ches cinsiers keupe'te ches cornes à ches bétails ; aprè, pu ed dinger qu'is tchè'te.

 

Os rmèrkrez chu l'photo qu'ech toèr o toudi ches cornes, pour protéger ches vakes.

Eute problinme innui qu'i o avuc ch'vint, ch'est pour tchuire del boinne vianne chu un fu ed bo, à l'cour ! Avuc ch'vint, ches braises pèrt'te. Qué brin ! Adon qu'i o un fin bieu solé !

Boin diminche à tertous.

Prudinche : si os pzez moins ed trinte tchilos, évitez d'aller tout seu à l'cour.

Un bieu moés ed moai

Os sonmes ach moés ed moai edpi sèt jours, et i pleut edpi ch'début dech moés.

Ches agritchulteus sont ureus, et ches eutes, ureusemint pour eux, n'sont poin in vagances. Don, i put pleuvoèr.

In puss, ch'est boin pour leu gardin.

Qué bieu moés !

N'oblions poin qu'ech premier et ch'uit dech moés ed moai sont des sinmdi. Cho, ch'est boin pour ches onmes d'éto et leus interprinzes.

Coèr miu.

Pensons étou à chl'intraineu et ch'jueu qu'étoai'te din chl'étchipe ed fotbal ed Pèris i o quèks moés et qu'ont gaingné merkerdi avuc unne étchipe ed fotbal inglés. Fuchons ureus pour eux.

Vivemint ech moés ed join !

Boin jornée, et définissez bin ch'moés ed moai.

Feut boère

 I o in Frinche unne fanme qui boèt poin d'ieu.

Ale boèt, mais janmoais d'ieu.

Ale pourroait boère del'ieu, mais nan !

 Ch'est un problinme.

Jou qu'i feut i mette l'tète din un sieu rimpli d'ieu pour qu'ale comprinche eq ch'est boin à boère et pour és'santé ?

P't'ête !

Mais i o adon deus nouvieus problinmes :

- truvoer ch'sieu,

- tnir l'tète del fanme et l'mette din ch'sieu.

Inter différents problinmes, i feut coésir chti qui foait ch'moinss ed mau.

O bin chti qu'est l'puss aisié à résoude.

Boin diminche à tertous.