Causez conme i feut

Unne bèle-soeur, fanme d'un ed mes frères, s'otchupe ed ches vius qui res'te din l'ouest del Sonme.

 

Et vu ech nombe ed vius qu'i o, ale o des gins qu'ouve'te avuc ale, et pour l'aidier, os comprindez. Is doé'te don i obéïr.

 

Pèrmi ches gins-lò, i o unne fanme à qui ém bèle-soeur o apprins à dire, quanq ale rinte din chin burieu, "Bojour, Mdame D*."

 

El fanme, l'o bin comprins. Achteure, quanq ale arrive, ale dit à m'bèle-soeur :

 

- "Bojour Mdame D." Cho, ale o comprins.

 

Pi ale ajoute :

- "Ch'est ch'brin din ch'gardin".

 

Pour dire qu'i o granmint ed désorde din ch'burieu d'ém bèle-soeur.

 

I sanne qu'ém bèle-soeur, ale éro toudi edl'ouvrage** avuc ches vius, et avuc és collègue.

Boinne jornée à tertous.

 

*D : ch'est conme mi, don, ej muche.

** Chin causer ed ches tiots-éfants qu'arrive'te cht'innée et de chti qu'ale o djò.

Unne bèle phrase

Din ch'live "Et quèks keups j'o conme unne grinde idée"- ej vos in o causé i o quèks tans - il est écrit, à l'première page ed l'introduction:

- "El vie est foaite ed gins qui voé'te, qui cause'te et qui pinse'te ; chin quoé, ale est rin."

Busez !

Conme ej vos l'avoais écrit, j'o mie ieu dzoin ed lire granmint ed pages pour ainmer ch'live.

A suive, et à béto !

Unne saprée comète

Min pu jonne frère ainme rbéïer ches étoéles. Et ches planètes et ches éspoutnikes. Et des keups, quanq il o granmint ed canche, un cailleu d'étoéle, unne figée d'étoéle, o bin unne comète.

 

Feut l'intinde causer !

 

- "Min frère, lò, t'os chl'Etoéle dech bértcher pi Marche, des planètes, pi lò, Ches Pléïades, pi lò, Syriuche, él Nébuleuse d'Orion, l'Grinde Orse pi l'Tiote,...".

I n'in connoait granmint. 

 

Syriuche, à main gueuche, et Orion

 

Este smangne, l'o vnu in vagances avuc és fanme, des vêtemints, et unne paire ed jumelles, pour rbéïer ches tans et ches étoèles et toutes ches eutes coses présintes lò-heut.

 

Et il o ieu del canche : i avoait, in début d'és smangne, unne comète eq li et mi avons bin vu. Durant troés nuits. Ureusemint ! Car ch'prochain keup qu'ale rviendro, l'comète, ch'est din chincante-mille ins.

Mi, j'o étou apprins qu'i avoait unne étoéle qui lonmoait Aldébaran. Casi qu'on diroait eq chin tiot nom i o étè baillé pèr deus gins qui buvoai'te un keup à l'santé ed leus pérints et qu'on dit "A tes pérints".

A mzure eq ches gins o conté cho, ch'o dvenu ch'tiot nom d'achteure.

P't'ête ! Mettons.

Disez-mi chi os ainmez étou rbéïer ches étoéles, chi os avez vu l'comète l'eute jour. Quanq os savons qu'ale mzure tchinze millons ed kilomètes, os avez du l'aperchuvoèr.

Bec à tertous, et grind merchi à min frère et m'bèle-soeur d'avir évnu nos vir.

 

Ches gins dech Nord

Ches gins dech Nord

Ont din leus ius ech bleu

Qui manque à leu décor

Ches gins dech Nord

Ont din leu tcheur ech solé

Qu'is ont mie à l'cour

Ches gins dech Nord

Ouve'te toudi leus uis

A ceusses qui ont souffert.

Ch'est bieu d'intinde cho ! Ch'est poin ed mi, fuchons hônnete, mais ch'est vrai, et j'ainme.

Boinne jornée à tertous, surtoute à ches gins dech Nord. Eq j'ainme.

Récompèrons deus canchons

Innui, ej vos propose ed récompèrer deus canchons qui s'rsanne'te ; unne est bretonne, l'eute, tchébécoèse.

Kminchons pèr ches tites : l'canchon bretonne s'lonme "Ches prisons ed Nintes", Nintes étant in Bretanne, et l'canchon tchébécoèse o pour tite "El prison ed Londes", Londes étant in Inglétère, mie au Tchébec. Don, os pourroème comprinde qu'à Nintes i o des prisons, et à Londes, unne seule. A vir !

Ches histoères sont casi ches minmes : unne gin est in prison, à Nintes o bin à Londes, slon chti qui cante, et ale rchut mie granmint ed visites. A pèrte l'fille ed chin wardeu.

Lò, ej baille un boin point à ches tchébécoès :p unne gin, ale est din unne prison, et mie din des prisons.

Un jour, i dminde à l'jonne quoé qu'os disons ed li in ville et ale i répond qui vo ête pindu. "Brin !" qu'i pense seuremint, mais qu'i dit mie. 

- "Adon, chin vos kmindez, déliez-mi mes piés" qu'il i dit.

Et ale obéit.

Et ch'est lò eq cho dvient drôle quanq os récompérons ches deus canchons :

- din l'version bretonne, ech prisonnié seute din l'ieu, la Loère, et s'seuve. Pi, i s'met à canter eq chi i rvient à Nintes, i mèriero l'fille.

- din l'version tchébécoèse, ech prisonnié seute un keup din l'ieu, pi i seute un deusienme keup din l'ieu pi i s'seuve. Aprè, i cante étou eq chi i rvient, i mèriero l'fille.

Maginez et disez-mi ! Quanq os vos seuvez d'unne prison, jou qu'os i rtornez un keup pour rkmincher un deusienme keup à seuter din del'ieu pi vos seuvez ?

Chi os avez ainmé min article, os pouvez acouter ches canchons chu internénèt.

Boinne jornée à tertous.

Em'famille sroait un clan

I o quèks tans, in dvisant avuc unne gin, vlò d'un keup qu'ale m'dit qu'ém famille rsanne à un clan.

Ej sus saprémint surprins, adon, j'i o dmindé pourquoé qu'i disoait cho.

- "Quanq os vos voéyez, os restez insanne, os causez insanne, os juez insanne. Pèr eximpe, à cartes. Os diroème qu'os êtes conme un clan."

J'o busé quèks sgondes pi j'i o répondu :

- "Os pourroème penser cho, mais ch'est unne crosse berlure ; i o quèks moés, m'fanme et mi avons alé à unne fête amon un bieu-frère, bieu-frère qu'avoait invité ches soeurs, ches bieus-frères et ches bélès-soeurs, mais étou ches nveus et nièces, eds amis, et bin seur, és fanme et leus éfants.

Mie unne gin del famille eq tu causes achteure.

Croés-mi ! Quanq os avons mangé, à nonne, au vèpe o au matin, chatchune ed ches familles s'o assis avuc des gins d'és famille, fin ureus ed s'rtruvoer.

Don, ém'famille est mie un clan, mais ureuse d'és vir. Quanq ale put."

Et ch'est fin bieu qu'ho fuche conme cho.

Boinne jornée, cros bec à tertout.

Ej publie cho ech uit févrié deus-mile-vint-troés, jour ed ches âges del première soeur ed min père. Ale o quater-vint-dis ins innui et j'i foais un cros bec. Boinne jornée à m'tante qui vo truvoer des frères, soeurs, bieus-frères, bélès-soeurs durant quèks eures. Qu'ale fuche ureuse ed vive cho, in famille.

Et quèks keups

... j'o conme unne grinde idée.

Ch'est ech tite d'un live eq j'o acaté i o quèks smangnes et qu'ej sus in route à lire. Ech live o étè écrit pèr Ken Kesey, anméritchin qu'avoait étou écrit "Vol au dsu d'un nid ed coucou" ; cho vos dit quèk cose, cho ? I o ieu un fin boin film ed foait.

Pour rvénir à min live, j'o lu chl'introduction et quatore pages, chu uit-chint-quater-vint-quatore qu'i o, et j'o djò pu invie d'arter del lire.

Seur qu'os in causerons d'eutes keups.

Boinne jornée, et in févrié, mingez eds boinnés landimoles. Avuc chuke, castonnade o chucola.

Tchulture politike

Ièr, achl'assemblée nationale, pour débatte del réforme ed ches rtraites, un onme politike o dit :

- "Quanq os vos pichez dsus (comprindez, din vos maronnes), os avez janmoais keud granmint ed tans."

Cho, ch'est bieu. In vrai, in premier, cho étoait dit din un film lonmé "El nuit nos appèrtient", sorti in deus-mile-sèt.

Cho m'permet ed dire eq ches onmes et fanmes politikes ont del tchulture. Et ej sus ureus del savoèr. Et ed vir qu'is nos in font profiter.

Julia ém rataïonne

Julia, taïonne ed min père, est morte quanq j'avoais alintour ed sèse ins d'âges. Et ale, ale avoait alintour ed quater-vint-douse ins d'âge. J'l'o bin connu.

 

Man Julia, conme os disoème, avoait unne sapré mémoère. Jonmoais,  qu'i m'sanne, ale s'o berluré chu ches tiots noms ed ches arrières-éfants. 

 

Man Julia ainmoait tcheude et broder. Et pour cho, i falloait qu'ale acate du tissus, du filé et eds adjuiles.

Rbéïez in-dsou des coses qu'ale o foait et eq mes tiots-éfants peu'te coèr vir :

Ed fin bieus ouvrages, qu'ej truve.

Troés tiotés anecdotes :

L'première : 

In ivèr, un jour qu'ale étoait avuc m'mère, is ont été din unne merchérie ed Tchin-Plage pour acater du filé mauve. Em rataïonne o dischuté granmint ed tans avuc l'fanme qui vouloait i vinde.

D'un keup, ale sanne avir truvoer.

 

- "Combin qu'ho veut ?" dminde m'rataïonne.

- "Deus francs et soéçante tchinze chintinmes ech mète" répond l'fanme.

- "Quoé !" qu'ale s'esclame ém rataïonne, "à Moreu, ch'est deux francs et onze chintimes?"

Em rataïonne, et m'mère, ont sortie del boutike, chin rin acater.

El deusienme aüre :

Ch'étoait un jour eq Man Julia étoait à Anmyin avuc chin bieu-fiu, père ed min père, don un ed mes deus taïons, pour acater du tissus.

Durant granmint ed minutes, él vindeuse o présinté des tissus à Man Julia pour qu'ale puche coésir chtol-lò qui i plairo l'puss.

Minme ech patron del boutike o vnu aidier és vindeuse à vinde.

Et ch'jour-lò, Man Julia a acaté du tissu ; vint chintimètes.

Ej pux vos dire qu'ém mère s'in ramintuve bin ed tout cho. Ch'est pour cho eq j'o pu vos l'conter. Merchi à ti , ém mère eq j'ainme granmint.

Infin, l'troésienme anecdote :

Un jour eq Man Julia étaoit in voéture avuc s'fille et chin bieu-fiu, z'ont ieu un tiot accidint : l'voéture o tchitté l'keuchie.

Man Julia o dit :

- "Dò ch'est qu'os allons conme cho ?"

Din ch'fossé.

Vlò ! Ch'est toute pour ch'keup-chi. Chi i o des gins qu'ont étou eds anecdotes, mettez un tiot conmintaire.

Boinne jornée.

Quanq un nveu oblie s'tête

... il foait des kilomètes pour l'rétchupérer.

Os dvoème minger insanne à nonne, cho sro achteure au vèpe.

Os dvoème minger del vianne ed bu à nonne, ej mingero du foié ed bu.

I dvoait rpèrtir au vèpe, cho sro dman, fin timpe au matin.

Pauve nveu ! Mais quoé qu'i foaiche, ej sro ureus ed l'atcheuillir. Ch'est un régalant nveu.

Boin diminche à tertous.

Arter d'ouvrer quanq os sonmes jonnes

Achteure eq tertout cause del réforme ed ches rtraites voulue pèr not présidint picard et chin gouvernémint, j'o apprins verdi qu'unne fin jonne fanme ed vint-uit ins d'âge alloait arter d'ouvrer à pèrtir dech moés ed moai.

Feut esplitcher, adon, ej vos esplitcher.

Ouvrer, ch'est quanq os ouvrons et qu'os rchuvons un gaingnage. Pour l'jonne fanme, in vrai, ale apprinds coèr chin ouvrage : séruzyin. Mais ale rchut un gaingnage.

Pour dvenir séruzyin, quanq eq t'os alintour ed dis-uit ins d'âge, t'ajoutes un in  - des keups, un deusienme keup un in - pi infin deus ins, troés ins, quat ins, chonc ins, sis ins. Ch'est défini ? Nan ! I o unne sétienme innée, pi unne uitienme, pi unne nuvienme innée. Pour d'autchuns, i in o coèr aprè.

In principe, aprè, tu ouves vraimint.

Lò, él jonne fanme o déchidé d'arter d'ouvrer avant d'avir défini és nuvienme innée. Ch'est possibe, pour sis o douse moés.

Et ale foait bin d'arter. Conme os disons granmint achteure, ale risque d'avir unne testchicule qui sort. don, feut miu arter un molet pour éviter cho. 

Notez qu'i o qu'unne testchicule qui sort, et notez étou eq minme ches filles pu'te avir unne testchicule qui sort. Ch'est unne espression.

A Mérseille, i o des jonnés filles qui bat'te leus testchicules. Qué monne !

Rprindons m'dvisirie.  

El fin jonne fanme eq j'ainme granmint vo don arter d'ouvrer inter sis et douse moés. J'espère granmint qu'ale vos truvoer eq quoé s'otchuper. Mais quoé qu'ale put foaire durant tous ches tans ?

Rin. Ale o l'droét ed rin foaire. O bin ale fro quèk cose.

Boinne jornée à tertous, et évitez d'avir unne testchicule qui sort.

El famille est unne canche

... qu'ont dit un jour un fin boin jornaleu*  - ech seu fin boin jornaleu qui existe et qu'ej connoais - et s'fanme, qu'ej connoais étou un molet, vu eq ch'est ém jonne cousine**.

Et ch'jornaleu et s'fanme avoai'te granmint raison. Et ch'est fin bieu qué del dire.

I o quèks smangnes, deus cousines, cousines étou d'ém jonne cousine, et leus onmes*** ont rprinds echl'espression din un message. 

J'o granmint ainmé, et m'fanme s'o ranmintuvé qu'ech cousin jornaleu et m'jonne cousine avoai'te écrit cho i o quèks innées. Adon, edpi, j'o déchidé ed créer un groupe chu internénet ed cousins, cousines, onkes et tantes lonmé El famille est unne canche. Un groupe pour causer ed toute et rin, mais surtoute pour maintenir du lien. Ed famille.

I sanne eq quèks gins ainme'te. Merchi à eux ed pèrticiper. D'eutes di'te rin ; z'ont p't'ête mie l'tan d'écrire.

Mi, i feut qu'ej rajoute ech puss ed cousins, cousines, onkes et tantes chu ch'groupe. Cho viendra, quanq j'éro leus numéros ed téléphone.

A béto !

Boinne jornée et bec à tertous.

* min cousin jornaleu - vu qu'il o mèrié ém cousine, ch'est min cousin - os pouvez l'acouter casi chake matin chu Frinche Inter.

** Maginez ! Em jonne cousine o né troés moés avant m'première fille.

*** leus onmes : j'o hésité à écrire leu onme, vu eq mes cousines ont un seu onme chatchune, o leus onmes, vu qu'i in o deus, chatchune ed mes cousines in ayant un. Disez-mi kmint qu'os éroète écrit cho.

Quanq i foait keud in ivèr

... ches nèges fonde'te.

Echt'innée, i foait tan keud eq minme ches bo fonde'te. 

Rbéiez ches deus clitchés :

 

Boinne jornée.

Keuper du bo

Keuper du bo durant deus jours ; jou eq ch'est des vagances o bin nan ?

Os pourroème dire eq ch'est conme ouvrer.

Mais chi tu jues étou avuc tin tchyin et eq cho t'foait du bin pour t'santé - et tin porté-monnoaie - qu'ed keuper du bos, disons eq ch'est des vagances.

Et minme des fins boinnés vagances.

Min scret

In début d'innée, j'o confié un scret à un fin boin conmarade.

Qu'in o causé às'fanme.

Qu'in o causé àl'myienne.

Qu'i m'in o causé.

Vlò unne innée qui kminche bin. 

Seuchez eq min boin conmarade sro toudi min boin conmarade.

Boin diminche à tertous, et coèr un keup, boinne innée.