Espérieinche avuc del ieu boli

 Pour chl'espérieinche-lò, i feut :

- del ieu

- unne castrole

- unne carotte,

- un u,

I feut étou del prudinche, vu qu'i feudro bolir l'ieu din l'castrole.

Pour kmincher, rbéyons l'carotte et chl'u ! 

L'carotte, ale est dutre ; echl'u est casvel, don i feut mie laicier tchère chin quoé i s'berzille.

Achteure, foaisons keuffer l'ieu et quanq ale bout, mettons ndan l'carotte et chl'u.

Après quèks tans, rbéyons !

El carotte, achteure, ale est fin molle. Chl'u, li, o dvenu dur.

Mi, ej truvoe erlusant ches deus cangemints pour l'carotte et chl'u.

Vlò ! Ch'est toute pour innui.

Boinne jornée.

 

Tiote idée pour Noë : chi vos galibiés ainme'te foaire eds espérieinches, unne carotte et un u peu'te foaire un bieu cadieu. Mais leu disez mie eq ch'est mi qui vos l'o dit.

Cafougnète et ch'mawais mossieu

Un jour, quanq Cafougnète rinte ed l'école, és mère i dit :

- "Cafougnète, moute tes cahiers !"

Cafougnète moute ches cahiers, et s'mère dit :

- "Ben, Cafougnète ! T'os toute gribouller tes cahiers ! Etpi, jou eq t'os étè sage ?"

Cafougnète i répond à s'mère :

- "Ben, j'o butché mes conmarades. Et j'o répondu àl'moaitresse."

- "T'os répondu àl'moaitresse ?? Ch'est toute conme chin voéyou ed père ! Nan mais tu sais, maman est in prousse, hein ! Tu vos filer din t'cambe, et quanq tin père vo rintrer, tu vos avir unne mornife ! Tu sais quoé ? Maman t'ainme pu !"

Adon, ech tiot, i monte din s'cambe et i s'met à brère.

- "Maman m'o pu quèrre ! Maman m'o pu quèrre !"

El pauve fanme, ale o chin tcheur toute rtorné, et ale buque à l'porte :

- "Acoute min fiu ! Maman t'ainme pu vraimint granmint, mais coèr un molet quanq minme. Ej vo t'bailler chonc frincs pour t'consoler, mais tu doés toudi dire "ouais". Toudi, toudi ! Comprins min fiu ?

- "Ouais !" qu'i répond ch'galibié.

- "Tu vos obéir àl'moaitresse ?"

- "Ouais !"

- "Tu vos aidier maman à nétier ches gates ?

 

- "Ouais !"

 

- "Tu vos aidier maman à astitcher ches cassis ?

 

- "Ouais !"

- "Tu vos aidier tin père à foaire ch'gardin ?

 

- "Ouais !"

 

- "A bailler ches épluchures à matcher à ches lapins ?

 

- "Ouais !"

- "T'es boin, min tiot ! Viens qu'ej té foaiche un bec. Toudi "ouais", hein !"

Cafougnète sort din l'rue.

- " Lalala ! J'o chonc frincs et j'vo acater des chukes et des pétèrds pour Mardi cros, et j'vo toudi dire "ouais" !"

I voét ech mawais mossieu. Et ch'mawais mossieu i dit :

- "Tu vux unne mornife ?"

Cafougnète i dit "ouais" ! 

Vlan ! Paf ! L'eute i met unne mornife !

Ech tiot rinte às'moaison fin trisse ! 

- "Euhhhh Euhhhh ! Tu m'avoais dit ed toudi dire "ouais". Ech mossieu i m'dit "tu vux unne mornife ?" Adon, ben mi, j'o dit "ouais" !"

- "Mais jou eq t'es un cros nikdouille ! Os diroème chin père ! 

Bin ! Maman vo t'bailler dis frincs, Mais à pèrtir d'achteure, tu doés toudi dire "nan". Quanq tu sais poin, tu dis "nan".

- "Tu vux continuer à foaire ech voéyou ?"

- "Nan !"

- "Tu vos coèr mette du brin din t'cambe ?"

- "Nan !"

- Tu vos coèr imbêter ches filles à l'école ?"

- "Nan !"

- "Tu vos réponde à l'moaitresse ?"

- "Nan ! 

Lalala ! Suffit qu'ej diche toudi "nan", ch'est aisié ! Avuc dis frincs, ej vo pouvoèr acater un live ed tchu !"

Ech galibié i sort din l'rue et qui qu'i voét ? Ech mawais mossieu !

 

Et l'mawais mossieu i dit :

- "Cafougnète, t'in o poin ieu assez ?"

- "Nan !"

 

D'aprè un taïon qui conte eds aüres ed Cafougnète ed tans in tans à ches tiots-éfants, l'diminche à tabe, et qu'o passé à l'télé ch'lundi tchinze dech moés d'avri deus-mile-dis-nu au vèpe, chu frinche-troés Nord et Picardie.

Merchi àch'cousin qui m'l'o invoéyé.

 

Pauve Cafougnète !

Boinne jornée.

A tertous ches garchons, et à ches gins qui s'lonme'te Nicolas, boinne fête.

Os mantchons ed jornaleus frinchoés

Ah ! Ches jornaleus !

Ièr au matin, j'acoutoais ch'poste et j'os intindu un jornaleu frinchoés qui ouvroait in Allemane. Poaiyis  voésin à l'Frinche edpi toudi.

Eh bin, ech jornaleu causoait in inglés à ches gins ! Possibe qu'il avoait mie apprins chl'allemand quanq il étoait jonne et à l'école.

Mais quanq minme ! Eq chin onme d'éto et sn'interprinze n'euche'te mie truvoé ed jornaleu frinchoés causant allemand, cho m'surprind granmint. Et m'intchiète.

Don, pour ches jonnes galibiés qui sont à l'école, os savez quoé qu'i o à foaire. O à apprinde.

O bin ches jornaleus causant allemand sont p't'ête malade o in vagances !?

Boin diminche à tertous, et cros becs à ches deus jonnes qu'ej connoais et qu'ont leus âges innui.

Tu comprinds conme tu vux

Chi o ti, i éro mie mi. 

Boinne jornée.

Chi t'es un fin boin cousin et eq t'os ets âges innui, cros bec à ti.

A ches cousins ed ches alintours ed Calais

Ches cousins dech nord,

Os l'savoète p't'ête, chin quoé ej vos l'dis, ej pense souvint à vos.

Innui, au vèpe, j'os invie ed vos l'dire coèr un keup. 

 

Quanq j'intinds tertous ches jornaleus et onmes politikes causer ed ches migrints qu'ainmeroai'te pèrtir in Inglétère, et qui, des keups, meur'te, ej pense à vos qui restez p't'ête à Wissant, Estchalles, Tardinghen, Audimbert o p't'ête Oyé-Ech-bord-del-mèr, et qui voéyez ches migrints chake jour.

 

I o lò un sapré problinme, et granmint ed misère.

P't'ête qu'i n'o pèrmi vos qui vu'te els aidier, d'unne manière o d'unne eute ! Quoé qu'os foaisèche pour eux, merchi.

 

Boin corage à vos.

 

Et bec à tertous.

Is étoai'te à Mérseille verdi

Qué bèle ville, Mérseille ! Ej vos in avoais djò causé din ches premiers articles eq j'o écris i o ... uit ins, in sectimbe deus-mile-trèse.

Quanq os pensons à Mérseille, os pensons ach Viu-Port, Pagnol, ech wèrtier dech Pènier o chti Del-Bèle-ed-Moai , echl'étchipe ed fotbal, ches bords del mèr, et Not'Dame-del-Warde, in clitchés lò-dsou.

 

 

                                                    

Et ièr, i avoait éms éfants ; in vrai, unne pèrtie d'éms éfants, avuc leu conjoint, et avuc leu fiu o leu nveu, slon éstchel d'éms éfants qu'os causons. 

 

Is étoai'te ureus insanne, et trantchilles conme Batisse. Cho foait plaisi ed vir cho.

A Mérseille, i o étou des rots et des keups, eds onmes politikes o eds onmes qui n'in font poin, ed politike, mais qui vont p't'ête in foaire. Mais cho, éms éfants n'in ont poin vu. Et z'ont mie tracher à in vir.

Ech puss important pour min fiu, mes deus filles et leu conjoint, ch'étoait un papar ed tchinze jours, min tiot-fiu.

 

Boinne jornée.

Chti qu'o bu

 ... o bu, et in principe, n'o pu soé.

A pèrte des keups in étè, quanq i foait granmint keup et lò, tu pux ête assapi et aglaver ed soé.

Mais in principe, quanq t'os bu, t'os pu soé.

I o malureusemint des gins qui boé'te, boé'te et boé'te, et poin qué del'ieu !

Ch'est un sapré problinme pour ches gins qui vi'te avuc eux.

Un tiot conseil pour ches gins qui boé'te conme cho : 

Quanq os rintrez vos joutcher, des keups fin timpe au matin - mettons qu'il est unne eure - frunmez ches uis del pièce dò qu'i o unne pindule qui vo sonner et minme répeter cho chonc keups.

Eute conseil :

Din l'cambe, joutchez-vos tchu à tchu, à coeuse ed ches flérinées qu'i o din vo'bouke et pour éviter des rmèrkes ed l'eute qu'est din vo'lit.

Infin, chi os rinvillez chti qu'est din vo'lit et qu'i vos dminde quoé-jou qu'os foaisoème, disez-li qu'os vos déjoutchez. Probabe qu'i vos répondro : 

- "Achteure ?"

 

Et os pourrez rester joutcher.

 

Ech miu, ch'est quanq minme ed mie boère conme un polonoés. 

Boinne jornée.

Un bétail chinoés

Kmint-jou est-i possibe qu'i o un bétail chinoés qui fuche miu soégné eq des fanmes, eds onmes et ds'éfants ?

Minme in Frinche !

I in o troés o quat à Bieuval, din ch'dépèrtémint dech Loèr-et-Cher, et os avons des gins célèbes qui vont les vir, prinde quèks clitchés avuc eux.

Ches bétails-lò, is matche'te quasi eq des erbes. Ch'est p'tête pour cho eq des gins vu'te étou matcher edl'erbe, et mie del vianne ?!

Mi, j'ainme poin toute l'réclame qu'os foaisons à ces bétails chinoés, surtoute quanq os savons kmint eq ches gins vi'te ureus din ch'poaiyis lò-bos ! Tu dis quèk cose qu'est vrai mais qui déringe, et hop, t'es invoéyé eute pèrte et os t'voéyons pu. Durant granmint ed jours, smangnes o innées.

I o qu'un indroét dò eq j'ainme vir ch'fanmeus bétail, ch'est chu l'panche ed min tiot-fiu.

 

Boinne jornée à tertous, longue vie à min tiot-fiu, et prions pour ches chinoés o chinoéses qu'ont dispèru.

 

Chi t'os ets âges innui, eq t'es unne bèle-soeur et eq tu lis granmint éms articles, fin cros bec à ti.

 

L'Titine d'Hallencourt

Titine d'Hallencourt, jé l'connoais edpi quèks innées, vu qu'os ouvrons din l'minme interprinze, et des keups, chu ches minmes affoaires.

 

Mais ej savoais mie, justch'à merkerdi, qu'ale étoait d'Hallencourt, tiot village alintour d'Arainne, qu'éj précise pour ches gins qui li'te min blog et qui connoai'te mie l'Sonme.

Merkerdi, j'o rchu un message achtchel j'o répondu. 

 

Quèks minutes aprè, min téléphone sonne.

 

Dring !

 

- "Bojour ED, ch'est Titine ! Ej t'apèle aprè tin message ; t'os mie ainmé ! T'es in prousse ?"

- "Nan Titine ! Mais i o des coses qu'éj comprins poin."

... bla bla bla...

- "Mais dò-jou eq tu m'causes ?" eq j'i dminde.

- "Innui, j'ouve à m'moaison, alintour ed Chantilly, din l'Oése."

- "Eh Tititne ! I o un fin boin restaurint à Noéyon, qu'ej pux t'dire, vu qu'ém mère reste à Nèle, din l'Sonme" eq j'i dis coèr.

- "L'Sonme ! j'o vétchu alintour d'Advyle" eq dit Tititne.

Os avons causé, et ch'est conme ho eq j'o apprins qu'ale est d'Hallencourt.

Ej su ureus d'ouvrer avuc unne fanme régalante conme cho.

Seur qu'os causerons coèr dech bieu dépèrtémint d'eutes keups.

Boinne jornée à tertous, et crosse pensée pour unne eute Titine, d'Hin, qu'étoait unne bèle-soeur.

I in o au moinss un

... qu'o ieu du corage :

Chi ch'étoait possibe ed tchitter un batieu quanq i o un hernu, mie unne gin n'éroait trécopé ches mers.

El bèle-soeur tolosaine

Tertoute o mie l'canche, conme mi, d'avir unne bèle-soeur tolosaine.

Mais l'eute jour, j'o ieu un problinme avuc cho. Ej vos esplique.

Ech onze novimbe, os m'disons qu'éme bèle-soeur ed Tolose o ches âges. Adon, pour i foaire plaisi, ej téléphone à m'bèle-soeur tolosaine. Qui reste à Tolose.

- "Allo, Pépète*, ch'est tin bieu-frère qui t'appele et qui t'foait un cros bec pour ets âges."

- "Mais, ED, ch'est poin éms âges innui, mais ceux ed Zézète*, no'bèle-soeur qui reste alintour ed Nintes, in Loére-Atlantike".

Brin !

Os pourroème croère qu'unne bèle-soeur tolosaine o mérrié unne gin ed Tolose o bin ed ches alintours et reste à Tolose, o ches alintours, et qu'unne bèle soeur nintoése o mérrié unne gin ed Nintes o ed ches alintours et reste à Nintes o ches alintours ! 

 

Eh bin lò, nan !

El bèle-soeur qui reste à Tolose o né à Nintes et o mérrié unne gin eds ches alintours ed Tolose, ed l'Aveyron, fin bieu dépèrtemint ed Frinche, et ém bèle-soeur qui reste alintour ed Nintes o né à Tolose et o mérrié un frère del bèle-soeur qui reste à Tolose, frère qu'o né à Nintes, conmme és soeur et m'fanme.

Os arrivez à comprinde ?

Ech onze novimbe, ch'est l'bèle-soeur né à Tolose et qui reste alintour ed Nintes qu'avoait ches âges, et ch'vint novimbe, cho sro l'bèle-soeur né à Nintes mais qui reste à Tolose qui els éro.

Fin complitché ! Surtoute quanq os voulons foaire plaisi.

Ureusemint qu'ech onze novimbe, j'o mie allé à Tolose pour foaire unne crosse surprinze à m'bèle-soeur ! J'éroais passé pour un cros nikdouille. Qu'ej su p't'ête !

Bec à tertous, et boinne jornée. A mes bèlés-soeurs tolosaines étou.

*Ches tiots noms sont mie ches vrais tiots noms ed mes bèlés-soeurs, pèr respect.

Soéçante-douse eures din l'pieu d'unne mère

Cho pourroait ête ch'tire d'un film, mais ch'est poin ed cho qu'ej vux causer innui.

 

J'os invie ed causer d'unne fanme qu'o dvenu mère i o soéçante-douse eures. Ches impressions ! Es nouvèle vie !

In vrai, l'fanme qui vient d'avir un papar pour chin premier keup, in principe, cho foait djò quèks moés qu'ale i pense à chin papar qui vo arriver et qui vo canger s'vie, et chtol-lò ed chin onme. 

 

Cho foait djò quèks moés qu'echl'éfant qui vo arriver bouge et buque din s'panche.

Cho foait djò quèks moés qu'él fanme et chin onme buse'te à ch'tiot nom qu'is bailleront à leu éfant, qu'is ont acaté quèks abits et eutes tchulotes, kmises.

Don, quanq ch'papar sort del panche, l'fanme dvient mie unne mère, mais unne nouvèle mère. Ale o coèr granmint ed coses à démucher, et il i feut du corage. Pour eds innées.

Soéçante-douse eures, pis soéçante-trèse, soèçante-quatore,... deus-chint..., et un jour, troés ins, ... pi coèr après, quarante-nu ins... .

Vlò quoé qu'il arrive, à unne fanme qui dvient unne mère.

Durant tous ches tans, i o du bonnur, i o edl'intchiétude. L'est important d'avir d'él famille et eds amis pour aidier ches nouvèles mères, pour foaire in sorte eq leu vie fuche un bonnur.

L'est important ed penser à eux et leu onme.

Et à leu papar.

 

Mi, ej foais q'cho d'i penser.

Boinne jornée à tertous.

Allons éfants

... del patrie, 

Ech jour ed gloère o arrivé.

Cho, ch'est pour penser à tertous che poélus morts pour seuver no'bieu poaiyis, durant l'première et deusienme djère d'i o soéçante-sèse et miu ed chint ins.

 

 

Prions pour eux, et pour ches gins qui, coèr achteure, protège'te no'poaiyis.

Os pourroème étou écrire o dire:

Allons éfants qui vienche'te ed naîte,

Qué l'forche ed vive fuche avuc vos !

Foaisez l'bonnur ed vos pérints,

Longue et bèle vie à vos,

Fuchez ureus pèrmi nos.

 

Cho, ch'est pour achteure penser à tertous ches papars qui vienche'te ed naîte, et à leu pérints qui démuche'te avuc l'naissinche-lò, un nouvieu rôle, des keups, aisié, des keups, malaisié, mais qui ainme'te granmint, pusse eq toute au monde, leu bieu papar.

Prions étou pour eux et leu pérints.

Boinne jornée.

Chi t'os ets âges innui et eq t'es unne bèle-soeur, cros bec à ti

Ches confitures

..., conte écrit pèr Georges Duhamel in mile-nu-chint-trinte-sis, din "Ches fabes ed min gardin".

Ech jour-dò qu'os avons ieu l'visite d'un économisse, os foaisoème nos confitures ed cassis, ed guerzèles et frimboéses.

Echl'économisse, sitôt, kmincha à nos esplitcher avuc des mots, des chiffes et des formules, qu'os avoème tort ed foaire nos confitures pèr nos-minmes, eq ch'étaoit unne coutume dech moéyen-âge, et qu'vu ch'prix du chuke, du fu, ed ches pots et surtoute ed no'tans passé, os éroème eds avantages à acater et matcher ches confitures foaites in interprinzes, qu'él tchestion sannoait trincher , eq béto, mie unne gin din ch'monde froait coèr l'berlure économike lò.

 

- "Attindez, Msieur !" qu'éj cris. "Ech mèrchand vindro-t-i quoé eq j'o ed miu et d'principal ?"

- "Quoé don ?" qui dit chl'économisse.

- "Bin, ches sintimints, Msieur, ches sintimints ! Respirez ! L'moaison toute intière sint boin. Conme ch'monde sroait trisse chin ches sintimints ed ches confitures !"

Lò, chl'économisse ouvrit eds saprés ius. Et mi, je kminchoais à m'inflanmer.

- "Ichi, Msieur" eq j'i dis, "os foaisons nos confitures uniquemint pour ech pèrfum. Ech reste o poin d'importinche. Quanq ches confitures sont foaites, Eh bin ! Msieur, os le jtons."

J'o dit cho pour ébleuir ch'savant. Mais ch'est mie vrai. Os matchons ches confitures, pour nos ramintuvoer leu pèrfum.

Coèr un conte eq j'o démuché din ch'live "Couvrez-les bin, i foait froéd à l'cour."

 

Echl'éfant préféré

Un conte, estrait dech live "Couvrez-les bin, i foait froéd à l'cour."

 

Un jour, un onme o vu vnir un eute onme qu'étoait, i péroait, un sage.

Et il o invie ed l'éprouvoér in i posant unne tchestion.

 

Qu'i pose :

- "I péroait eq t'os granmint d'éfants. Estchtel d'éts éfants jou eq t'ainmes ech puss ?"

Ech sage i répond :

- "Chti d'éms éfants qu'ej préfère est 

              ch'pu tiot justch'à qu'i dvienche grind, 

              ch'pu loin, justch'à qu'i rvienche, 

              chti qu'o du mau, justch'à qu'i djériche, 

              chti qui in prison, justch'à qu'i fuche libéré, 

              chti qu'est éprouvé, justch'à qu'i fuche consolé."

Quo ch'est qu'os in disez ?

Pour mi, ch'est un fin boin live eq j'o acaté aprè vos in avir causé ech sèt octobe decht'innée.

Boinne jornée.