Sis ins

Sis ins innui qu'ej vos écris.

Sis ins qu'un jour, ej m'o déjoutché avuc chl'invie d'écrire in picard, pour foaire vive l'bèle langue qu'est ch'picard.

Djò sis ins, avuc casi un article pèr jour. J'in su aux alintours ed deus-mile écrits. N'in manque un tiot molet pour attinde ches deus-mile ; cho viendro din quèks smangnes.

Ej su toudi ureus pour vos mette quèks lignes, toudi ureus ed vir qu'i o des gins, din ch'monde intier, qui ainme'te et qui li'te.

Ej vo continuer.

Et vos étou, continuez dé rbéïer.

Pour ches tchurieus, rtorner vir l'première page ed min blog : os érez unne crosse surprinse.

A béto.

Ches conmunisses d'un jour

... o ed deus o troés jours.

Qui-jou qu'is sont ?

Is sont ed toutes ages, ed toute l'Frinche, et is vien'te un, deus o troés jours pèr in à l'Courneuve, pour l'fête ed l'Unmanité, début septimbe, chake innée.

Conme achteure.

I in o quèks uns qui i vien'te pour acouter ches conmunisses, mais in i in o étou granmint qui sont lò uniquemint pour acouter tertous ches canteus.

Ches gins qui vien'te pour acouter l'musike, is sont des keups, capitalisses.

Cho m'foait bin rire.

Is ne l'di'te mie qui sont capitalisses.

Boinne jornée à tertous.

Canter in inglés

Io quèks smangnes, j'o intindu un jornaleu dminder à des canteus :

- "Jou eq ches canteus frinchoés sont obligés ed foaire des canchons in inglés conme os vnez del foaire ?"

Et ches deus canteus d'i réponde :

- "Ech tite ed not canchon, ch'est du latin".

- "Os disez vrai".

Sapré jornaleu !

Conme ches eutes ! I n'o toudi un pour nos foaire rire.

Boinne jornée.

Soégnez vo'prostéte

Pour ches onmes :

I péroait eq pour n'mie avir du mau à no'prostéte in viusisant, nos, ches onmes, i feut, o feudroait, toudi s'assir pour picier.

Ej croés eq ch'est vrai, vu eq ches fanmes n'ont poin ed problinmes. Ed prostéte.

Cho viendro p't'ête, qu'is in ont des problinmes, ches fanmes, vu qu'achteure, is vu'te picier dbeut.

A suive.

Savoèr cartchuler et dviser

I o des gins qu'ainme'te granmint ches mathématikes, et d'eutes qui ainme'te miu dviser.

I o des gins qui rchu'te unne médalle vu qu'is sont fin boin pour cartchuler, et d'eutes, per eximpe ches jornaleus, pour qui causer est leu ouvrage.

Etpi, i o ches onmes politikes.

Edpi quèks smangnes, i o unne gin, connu pour ches compétinches in mathématike, qui veudroait achteure ête un jour ch'merre ed Pèris.

L'o l'droét. Ed reuver.

Mais quanq ej l'acoute causer, j'o des boutons.

Cartchuler et dviser, ches deus coses différintes.

Mi, ej dis que quanq os savons mie, os foaisons mie.

Et i o poin qu'in politike.

J'o apprins ièr au vèpe qu'i avoait un mathématichien qui foaisoait del musike avuc ches élèves. Del musike nouvèle, lonmée rap.

Ches jonnes, is ainme'te.

Mi, j'o ieu un professeu ed mathématikes qui nos causoait mécanike.

J'o quanq minme rtenu ches mathématikes et poin l'mécanike.

Boinne jornée à tertous.

Lire din ch'pichon

Panoramisk, ech fanmeus druide ed ches gauloés Astérisk et Obélisk, l'foaisoait : édviner chl'avenir in lisant din ches intrailles ed pichon.

Et vu qu'os sonmes ches déchindints ed ches gauloés, os pouvons étou lire din ches pichons.

Per eximpe, din ch'dépèrtemint del Loère, i o des gins qui juge'te l'tchalité ed l'ieu in rbéïant ches pichons.

Fin aisié, qu'ej pense.

Maginez !

- un pichon ureus din l'ieu et eq ches pékeus n'peu'te mie haper, ch'est boin, l'ieu est boinne.

- un pichon qui nage mie rade, i o, p't'ête, un tiot problinme din l'ieu ; feut foaire eds analyses ed l'ieu.

- un pichon qui est chu ch'dos, i o un vrai problinme. Ches pékeus-liseus-din-ch'pichon vos déconseille'te ed nager din chl'ieu. Et chi possibe, feut mie in boère.

Ej truve cho bieu d'avir din ch'monde, pèr eximpe in Frinche, des spécialisses del vie ed ches bétails, des gins qui sai'te observer.

Et tout cho vient ed Panoramisk, not rataïon !

Feut eq jé rlise ches aüres d'Astérisk et Obélisk pour miu comprinde not monde.

Et étou pour rire un grin keup.

Boinne lecture étou à vos.

Cho kminche pèr un A

Albanie, Indorre et Erménie, pour ches gins qui cause'te frinchoés, cho s'dit Albanie, Andorre et Arménie.

Ch'est p't'ête pour cho eq sinmdi au vèpe, pour l'rinconte ed fotbal inter l'Frinche et chl'Albanie, echt'onme qui met ches musikes ed ches deus poaiyis avant ech début del rinconte o confondu l'musike ed l'Albanie avuc chtol-lò d'Indorre. Etchipe qui vient juer mardi.

Ch'est p't'ête pour cho étou qu'echt'onme qui s'o estchusé aprè, un eute que chti qu'o mis ches musikes, o confondu Indorre et chl'Erménie.

O bin....

Ches deus onmes étoai'te, bin avant l'rinconte, insanne à unne foére à vins.

Ch'vin, ch'est boin, mais feut ête raisonnabe.

A ches deus : dman, os pourrez mette l'musike edl'Albanie et présinter vos estchuses à ches jueus d'Andorre.

Boinne jornée.

Is rprinde'te leu fusike

Ches cacheus.

Inviron unne mitan ed ches cacheus put, innui, rsortir et utiliser chin fusike.

Cho foait granmint causer ches jornaleus, conme chake innée, et nouvèle cose, qu'i m'sanne, ches écologisses et onmes politikes.

Ches cacheus ! I n'o des boins et des mawais.

Kmint foaire l'différinche inter eux ?

Fin aisié.

Un boin cacheu, quanq i voét quèk cose bouger, mettons unne coaille, i met chin fusike à sn'épeule etpi, i tire.

Adon qu'un mawais cacheu, quanq i voét quèk cose bouger, mettons étou unne coaille, i met chin fusike à sn'épeule etpi, i tire. Mais, ch'est poin l'minme cose qu'avuc ech boin cacheu.

J'érmerchie granmint ches troés comikes qui m'ont apprins cho, et ej conseille à ches gins qu'ainme'te, conme mi, mèrcher in campaigne, din ches bos o in montaingne, ed mette ....

...un ganne espincer, et ed randonner.

Boinne jornée, et soin à vos.

Un responsabe agritchole ed brin

Intindu timpe au matin din ch'poste ed radio.

Ech présidint d'unne cambe d'agritchulture causoait à un jornaleu ed ches décisions prinses pèr ech préfet ed chin dépèrtemint ed keuper eds oliviés.

- "Avant d'abolir ches deus abes qu'ont ech nouvieu mau, un insecte vnu d'Italie, feut vérifier qu'is ont bin ech mau-lò.

Aprè, l'est possibe d'impêtcher qu'ech bétail pèrte eute pèrt in mettant des filets alintour ed ches deus abes".

Fin cros nikdouille, responsabe ed brin, édjoïsse au possibe !

Ech mau est djò fin connu. In Italie.

Etpi, ch'est mie un problinme, mais un vrai fléau.

Feut don agir fin rade.

Mi, ej pense, qu'i feudroait keuper miu eq ches deus abes. Keuper ches oliviés din ches alintour d'un kilomète.

Et espérer.

Mais lò, chi ch'préfet acoute ech l'agritchulteu - qu'o p't'ête ches deus abes - os érons béto eds insectes à Nyons et pèrtoute dò qu'i o ches bieus abes.

Malureusemint pour ches eutes cinsiers, des responsabes conme cho, i n'o granmint.

Cho rime avuc brin.

Adon, brin.

Un boin photographe est mort

Ech photographe allemand lonmé Pierre Lingebergue est mort mardi.

I foaisoait granmint ed bèlés photos. In noèrt et blanc.

Conme j'ainme in foaire.

Ch'est un ed mes frères qui m'o foait démucher ech boin photographe. Jé lé rmerchie granmint.

Donmage eq li, min frère, n'ainme poin ches photos in noèrt et blanc.

Mais Pierre, fuche trantchille, ej continuero à t'foaire honneur.

Adé, chl'artisse.

Naîte avuc deus dints

Naîte est unne bèle cose ; ech père et l'mère dech papar sont ureus ed vir l'vraie tète dech tiot.

Pour l'mère, in puss, ch'est ch'monmint ed vider s'panche.

In principe, un fin jonne papar naît avuc unne bouke, mais poin ed dints, ndan.

Eh bin ! Din ch'Pas-ed-Calais, à Béthune, i o unne fille qu'o né avuc deus dints, à ale, din s'bouke.

Mie croéyabe !

Coèr moinss croéyabe, ale o né ech vint-et-un dech moés d'eu ; un bieu jour qui vo seuremint i bailler del canche.

Cros conseil pour s'mère : norris t'fille avuc un biberon, et mie avuc ets tètes.

Et fuchez ureus.

Tiot bec à t'fille. Ej mé ramintuvroai toudi ches âges.

Vu qu'ej cause ed ches âges, chi os croésez m'mère innui, foaisez-li un cros bec.

Ches galibiés jue'te

Os sonmes in septimbe, mais toudi in étè.

Et i foait bieu.

Adon, ches tiots, quanq is ont poin école, quanq is étoai'te in vagances i o coèr quèks jours, o bin aprè l'école, is jue'te à l'cour.

Et sont naïus, vu leus âges, et fin ureus.

Et ed les vir conme cho, cho foait plaisi.

Merchi à vos, ches jonnes, ches tiots ed continuer à vive conme des tiots, conme j'o vétchu i o chincante ins.

Merchi.

Un boin cadieu

L'eute jour, unne bèle-soeur m'o ramintuvoé quèk cose eq j'avoais dit i o alintour ed vint-chonc ins.

Os étoème insanne à un bieu mériage quanq ale m'o rapplé cho.

I o vint-chonc ins, min frère et ale ont ieu unne - première - fille et m'ont coési conme parrain del tiote.

Qui, achteure, o vint-chonc ins mais est toudi tiote. Pour ches âges.

Don, ej su parrain. et i o unne morraine.

Normal, os foaisons chatchun un o des cadieus à not filleule. Pèr eximpe, pour ch'batinme.

L'morraine dit à m'bèle-soeur :

- "Vlò un cros cadieu pour t'fille. Cho vient ed Pèris."

Et i pèroait eq mi, j'éroais dit :

- "Vlò un tiot cadieu pour t'fille. Cho vient dech tcheur."

M'bèle-soeur avoait granmint ainmé, vu qu'ale s'in ramintuve coèr.

Cho m'foait granmint plaisi.

Minme chi mi, j'avoais oblié.

Boinne jornée.

Lette à un merre

... din un tiot village del Sonme.



Monsieu ch'Merre, bojour.

J'écris innui vu qu'i o quèks jours, j'o dormi à Gueuvilé et eq j'o ieu quèks problinmes.

Ej t'esplique :

M'fanme et mi vouloème dormir à Gueuvilé, et i avons dormi. In vrai, os avons assayé ed dormir. Not'problinme, ch'o étè ches canèrds et ches glinnes din ch'village.

Ches premiers, ches canèrds, cant'te fin timpe au matin, alintour ed quat eures. Os avons ieu granmint ed mau à nos indormir.

Et quanq os étoème indormis, vlò eq ches deusienmes, ches glinnes, ponde'te ed us. Et s'met'te à glousser granmint ed tans, fin ureus qu'is sont d'avir pondu. Mais l'étoait sèt eures !

Ureusemint pour nos qu'i avoait mie ed beudets, et qu'ech tchuré n'o mie sonné ches clokes !

Vu eq t'es unne boinne gin, eq min frère m'o dit, ej t'écris pour eq tu dmindes à ch'merre ed Gueuvilé, eq tu connaois seuremint, d'interdire à ches bétails ed canter inter vint eures et dis eures, pour eq ches gins peu'te dormir trantchille ; min blanc-bonnet et mi ainmeroème rtorner à Gueuvilé pour visiter ech village et ches alintours.

Boinne canche à ti, et merchi ed m'écrire pour qu'ej seuche chi ch'est foait. A moinss eq tu vienches à no'moaison, avuc t'fanme chi tu vux, bir un ju et in causer.

A béto !,

                                                                                               ED

Un chin fu n'lu pèrte in voéyage

Ch'étoait à Lile, et ch'est min frère qui m'o conté quoé qu'ej vo écrire achteure.

Don, min frère étoait à Lile un jour.

I voét un chin fu n'lu avuc unne boutèle d'ieu din s'main gueuche.

Cht'onme s'boaisse pour haper l'bertèle à main droéte ed chin so à dos, et l'mette dsu chin dos.

Pi, i met s'boutèle d'ieu à main droéte pour haper achteure l'bertèle à main gueuche ed chin so à dos.

Infin, i pose ch'boutèle et frunme ech chinture dech so dvant ch'panche.

Pi, i pèrte.

Min frère, qu'i n'boét mie granmint, et qui ch'jour-lò n'avoait poin bu, o vraimint vu cht'onme foaire tout cho.

Mais in vrai, ech chin fu n'lu n'avoait poin ed so à dos.

J'in profite pour dire à ches gins qui connoaisse'te mie Lile eq ch'est unne fin bèle ville.

Boinne jornée à tertous.