Jou qu'os connoaissez Dédé Valadier

... ech onme qui, achteure, o quat-vint-troés ins et qui o erlinché, i o chincante-sèt ins, l'coopérative Jonne Montaingne et ech fin boin freumage ed Laïole, in Aveyron ?

A pèrt ches gins dech dépèrtemint-lò, o del région qui s'lonmoait coèr i o dis-uit moés Nonne-Pyrénées, o coèr ches gins qui ainme'te et fabrique'te ed boins freumages in Frinche, et p't'ête in Urope, mie granmint n'connoai'te Dédé Valadier.

Qué donmage pour eux !

Qu'ej vo conte.

Un sinmdi ed déchimbe mile-nu-chint-quater-vint-quat, i feut qu'ej voéche amon Dédé Valadier pour ouvrer, vu qu'il est djò responsabe del coopérative et qu'il est malaisié à vir.

Adon, vu eq j'o mie pu l'rinconter inter un lindi et un verdi, j'i o allé un sinmdi au matin. Rindez-vos étoait prind. Ech vint-nu déchimbe qu'ej mé ranmintuvoe précisémint, vu eq min frère étoait in vagances amon mi.

Don, ej vo amon Dédé Valadier, à l'Terrisse. Min frère est avuc mi et vo m'attinde in voéture.

Ouais, mais Dédé n'est mie à s'moaison, et i tchait des nèges ! Os sonmes in déchimbe, in Aubrac.

S'fanme m'foait intrer, m'offre un ju.

I tchait des nèges, et Dédé n'est mie lò.

D'un keup, s'fanme voét qu'i o unne gin din m'voéture. J'i esplique eq ch'est min frère.

- "Qu'il rinte !"

Il rintre, pi Dédé arrive quèks tans aprè.

Ches aidjuilles dechl'orloge ont torné. Os sonmes achteure alintour ed nonne.

- "Os allez mingé avuc nos !"

Et min frère et mi avons mingé avuc Dédé et s'famille.

Qué sapré boin souvnir eq cho nos o foait, à min frère et mi !

Ej pux vos dire, os l'avez p'tête adviné, qu'ej minge quanq ej pux, dech freumage ed Laïole. Ej foais étou, quanq eq ch'est possibe dechl'alidjot.

Merchi Dédé pour tout quoé eq t'os foait pour tin bieu paoiyis qu'est echl'Aubrac.

Pour ches gins qui sont intéressés, i o achteure un live chu l'vie ed Dédé Valadier .

Ech leu et l'berbis

Ej vux mie vos conter ech fabe ed Jean del Fontaine. Mais vo s faoire buser.

Jou qu'os êtes pour qu'i o des leus din not poaiyis ?

Os pouvez l'êtes, vu qu'os sonmmes libe.

Jou qu'os n'voulez pu minger ed vianne, vu ches animaux souffe'te quanq is sont tué din ches abattoèrs ?

Os pouvez étou, vu qu'os êtes, toudi, libe.

Jou qu'os êtes pour qu'i o des leus din not poaiyis et qu'os n'voulez pu minger ed vianne, vu ches animaux souffe'te quanq is sont tués din ches abattoèrs ?

Os pouvez mie ! Minme chi os êtes coèr libe.

Pourquoé ?

Din un abattoèr, quanq unne bète est tuée, il est possibe qu'ale souffe quèks sgondes. Mettons unne à deus minutes.

Quanq un leu arrive, o des leus arrive'te din un ho ed berbis, is tue'te quèks berbis. Et  ch'est eutés berbis qui n'sont mie tuées, is sont treumatisés pindint eds eures. Et minme des jours. A un point eq des keups, i feut adon les tuer.

Dmindez à un cinsier qu'o ches berbis qu'ont vu ech leu, i vos esplitchero cho fin bin.

Et continuez ed minger del vianne.

Ech calimuchon malureus

Ch'est l'histoère d'un calimuchon qu'est senestre.

I n'o un chu vint-mile o un chu un millon, Ech nombe est différint slon  ches scieintifiques ! J'i pux rin.

- "Quoé eq ch'est qu'ho, un calimuchon senestre ?"  qu'os vos disez seuremint.

Et bin, ch'est conme aprè :

Pour dessiner esn'écaille, in kminchant per ech mitan, feut torner din l'eute sins eq ches adjuilles d'unne orloge. Prindons unne orloge conme eximpe, vu eq chu ches montes d'achteure, i o pu d'adjuille.

Et eq ches jonnes d'achteure n'sai'te pu quoé eq ch'est. Pan ! Din leus dints.

Ervenons à not calimuchon.

O bin, in vrai, à ches eutes, dits destres. Rbéïez in dsou à quoé cho rsanne :

Pour les dessiner in pertant dech mitan, feut torner conmes ches adjuilles d'unne orloge.

Adon, pourquoé qu'il o du malur, ech calimuchon senestre?

Vu qu'i n'o qu'un chu vint-mile o chu un millon, i l'o granmint ed mau à truvoer un eute calimuchon pour foaire l'anmour, vu qu'il feut eq cho fusse étou un calimuchon senestre.

Il o unne canche chu vint-mile o chu un millon.

Ej vos cause ed cho, vu eq j'o lu din unne gasète eq des gins din ch'monde avoai'te truvoé deus calimuchons senestres pour foaire plaisi à un eute calimuchon senestre inglés.

Eh bin ! Ej vos l'baille in mile, ches deus calimuchons truvoés ont foait l'anmour insanne. Et mie avuc echl'inglés.

Malureus ed vir ho !

Ech cinsier et chin minisse

Din ches innées mile-nu-chint-soéçante-dis, alintour ed chonc à sis-mile gins acout'te ech minisse ed l'agritchulture causer.

D'un keup, i o un cinsier qui i dit :

- "Jou qu'os allez m'dire kmint traire mes vakes ?"

Ches gins appleudisse'te granmint.

Ech minisse l'intind, buse quèks sgondes et i répond :

- "Nan ! Mais ech lait qu'est din vos bidons, ch'est mi qui l'vind."

 Ches gins appleudisse'te coèr granmint.

Pour vos aidier à comprinde, ch'étoait quanq ches minisses ed l'agritchulture ed ches différints  poaiyis ed l'Urope fixoai'te ches prix pour l'innée qui vient.

Proverbe afritchin

Quanq tu rintes din unne ville, chi tu voés eq ches gins mèrche'te chu leu tète, mèrche'te conme eux chu et 'tète.

Ch'est conme cho eq tu comprindros et eq tu pourros leu apporter quoé eq tu sais.

Min premier pichon

I o quèks jours, j'o lu din unne gasète un article chu un pékeu ed soéçante-et-onze ins.

Echt'onme disoait :

- " Ech premier pichon ed l'innée qu'ej pêque, j'i foais un bec et l'rmet din l'ieu."

Quanq minme ! Foaire un bec à pichon ! Et pourquoé mie à unne vake qui vient ed foaire un vieu ?

Jou qu'os pouvons foaire ho avuc l'première bèle fille ed l'innée qu'os voéyons passer ? L'attraper, i foaire un bec et la laicier rpèrtir ?

Interdit ed moérir

... amon ti.

Ch'est quoé qu'o déchidé ech mèrre dech village ed Laigneville din l'Oèse.

In vrai, ech mèrre vut manisfester conte ech manque ed séruzyins, surtoute din ches tiotés villes.

Pourquoé ?

I o quèks jours, un onme est mort amon li, à Laigneville, et i foaisoait keud. Cho put arriver qu'i foaiche keud in Picardie. Maginez quoé qu'i s'passe quanq ch'est conme ho !

Mi, ej pense qu'avant d'interdire ed moérir, i feudroait p't'ête interdire ed foaire eds éfants. O bin eq ches papars n'naiche'te mie à .Laigneville.

Quoé qu'os in pensez ?

Du mau à no'tchuir - ech darain épisode

Mes cousins, mes frères, mes taïons et mi avons vu granmint ed gins célèbes. mais étou, ed fins bèlés rincontes.

Mais après ches rincontes, quoé qu'i o ?
Et dman, quoé qu'os frons ?


Feut qu’ej vos diche : avuc mes cousins, os avons constaté qu’inter ech fotbal et ch’rugby, i avoait unne sapré différinche, chin causer ed nos ch’est seur, mais ed quoé qu’i o aprè ches rincontes : Ach fotbal, i o, in principe, din ches rincontes, mie ed keups qui foaiche'te du mau. Mais aprè, ches deus étchipes s’di’te adé et ch’in vont din leu ville. Ach rugby, ch’est seur qu’i o des keups din ches rincontes qui peuche'te foaire du mau à ches jueus. I o qu’ò vir leus djifes aprè ches rincontes. Mais lò, aprè ches rincontes, toudi, edpi eq min taïon est né in mile-nu-chint, ches jueux ed ches deus étchipes minge’te insanne. Avant ed rintrer din leus moaisons. Et nos, os truvons ho fin bieu.

Achteure, os savez qui qu’ej su, kmint qu’ej su né, in vrai, kmint eq mes taïons ont vétchu, tout quoé qu’os avons pu vir ed bieu edpi chint-tchinze ins. Adon, edman, quanq os butcherez unne balle, oronde o mie oronde, pensez à mi.

Etpi, vu eq j’i pense, jou qu’os pourroète juer in keuchons, chin keuchures à cleus ?

Seuchez qu’ej su toudi ureus ed vos vir. Pour qu’ej sorche d’emn anmoèle.

A béto !

Ach mitan del Russie

Innui, i feut m'croère, ej vos écrit edpi l'Russie. Pour ête précis, edpi l'Sibérie.

M'fille i reste edpi octobe, et ale vo rintrer in Frinche in juillet. Don, pour aller i foaire un bec, ch'étoait achteure. O jonmoais. O in Frinche din troés smangnes.

Pour foaire simpe , os éroème pu, m'fanme et mi, attinde juillet qu'ale rinte.

Mais pour i foaire plaisi, et démucher un poaiyis qu'ej connaois mie, ch'est bin d'i ête evnu.

Vu qu'os avons granmint ed coses à vir et ed gins à rinconter, ej vos mie vos écrire granmint innui. Mais ej vos rincontrer toute din quèks jours.

Cros becs ed Russie.

Ches punmes-ed tère in montaingne

I o quèks smangnes, alintour dech vint-chonc dech moés ed moai, ach téléphone, unne fanme m'esplique qu'ale vo aller planter ches punmes-ed-tère din ches Alpes, à Heuteluce in Savoé.

Mi j'i dis, in rigolant, qu'ale doét adon les dépouiller in septimbe.

- "Nan !" qu'ale me répond, "ej les minge à pertir dech tchinze juillet."

J'o rin dis ed puss, mais à mi qui su fiu et tiot-fiu ed cinsiers qui plantoai'te granmint ed punmes-ed-tère, din l'Sonme, dépertemint ed ches roés del punme-ed-tère, feut mie foaire croére cho.

J'o rin dis, mais j'o comprins : l'fanme met ches punmes-ed-tère in tère, et deus moés aprè, ale les défique ; Ches minmes, qu'ale défique.

Ej vo vos surprinde

Kmint vos surprinde ?

In vos disant qu'ej vo écris edpi un avion qui pèrt pour Moscou.

Eh ouais ! Ch'est possibe ed foaire cho !

Conme i sro seuremint possibe ed vos écrire edpi l'Russie ches prochains jours.

Continuez de rbéïer min blog.

Ech cadieu ed min frère

I o quèks jours, un ed mes frères m'o invoéyé eds vius articles dech fanmeus Courrier Picard.

Ches articles sont in picard.

Et i n'o un qu'o étè publié avant mile-nu-chint-quater-vint-deus.

Aisié pour mi à savoèr, vu qu'il o étè écrit par min taïon, et eq li est mort avant mile-nu-chint-quater-vint-deus.

Min taïon, quanq il écrivoait in picard, s'foaisoait lonmer "ech cafouilleus", mais chin n'étoait mie un, ed cafouilleus, ch'est seur.

Esn article s'lonme "Ech laboureus pis es éfants". Cho cause ed cinsier, conme l'étoai'te mes taïons. Un jour, ej vos l'écriro chu mon blog.

Merchi min frère, becs et corage à ti.

Prier et randonner

Jou qu'os avez djò voulu prier quanq des gins randonne'te alintour ed vos ?

Granmint malaisié.

Ech problinme, malureusemint, ch'est surtoute eq granmint ed gins n'prie'te pu. Don, peu'te randonner, chin penser à ches eutes.

Minme innui din ches églises, cho randonnero granmint. Qué malur ! Ches gins vont vnir conme quanq is vont à l'foère à vake !

Pourvu qu''edman, tout fuche boin ! Cho, ch'est unne fin tiote mais vraie prière.

Et os dvons prier étou pour ches inglés.

I pèrtiro ed Brussels

... in deus-mile-dis-nu.

Ej vos cause dech Tour ed Frinche in bicyclète qu'i o tous ches ins in juillet, et casi toute in Frinche.

In deus-mile-dis-nu, cho fro chincante ins qu'Eddy Mersk o gaingné chin premier Tour ed Frinche.

Vu qu'il est ed Bergike, qu'aprè, i n'o coèr gaingné quat eutes, et eq ches gins conme li sont mie granmint, ches ordjanisateus dech Tour ed Frinche ont ieu invie d'i rinde honmage.

Pourquoé mie !

Conme m'dit min tiot frère eq j'ainme bin, ureusemint qu'Eddy Mersk est mie né in Australie.

A buser.

Bec à tertous, et merchi à min frère.

Du mau à no'tchuir - echl'épisode sèt

Mi et mes taïons avons prins des keups, mais pèr des gins célèbes. Pèr eximpe, Nanard L'Uis.

Et not vie ed famille ?

Mes cousins et mes frères, ej les voés granmint, in smangne, quanq os sonmes ringés insanne din unne plache o unne anmoèle, à attinde ches merkerdis aprè-nonne o ches sinmdis et diminches pour aller à l’cour. Adon, in intindant, os causons ed fotbal o ed rugby. Ches puss vius d’inter nos cont’te ed bèlés rincontes qu’is ont vétchues, o eq leus pèrints leus ont contées.

Ah ! Ches bèlés rincontes ! Frinche Nouvèle-Zélinde, ed mile-nu-chint-quater-vint-dis-nu ! Frinche Brésil, ed mile-nu-chint-chincante-uit, avuc Kopa, Fontaine et ech jonne Edson ! Harondel Canapes, ed mile-nu-chint-soéçante-sèse, avuc ech tiot Manuel et chti qui vos écrit em vie, vu eq j’o mie ed bros ! Toulouse Toulon - à l’télé, ho baille Toulo Toulo et ho, ho m’foait rire - o Toulouse Clermont-Ferrand, alintour ed ches innées deus-mile ! Qui n’se ranmintuvoe mie ed tout ho ? Chi i in o, h’est bin donmage pour eux.

Min père, un jour à Jean Bouin, est arrivé, butché pèr Flipe Chello, din ches bros d’un tiot qui rbéïoait l’rinconte. Ech galibié o ieu invie de l’warder pour li. Mais ches pèrints dech tiot, pi ches eutes gins qui rbéïoai’te, pi aprè, ches jueus, i ont esplitché qu’i falloait l’rinde pour définir l’rinconte. Ech tiot o brai. Mais o rindu min père à ches jueus.

A suive.