O-jou eq tu vux dormir

Ièr, je rbée chu internénet eds adresses pour aller dormir in vagances avuc m'fanme et deus éfants, min fiu et un nveu.

Et quoé qu'ej truvoe chu un site ? L'possibilité d'aller dormir in prison. Mie croéyabe, mais vrai. 

J'éroais minme pu coésir ches étoèles. Feut qu'ej té diche eq j'os coési eute cose. Mais j'os bin ri.

Jour ed Mèrie

Tchinze dech moés d'eu, Assomption, jour ed Mèrie.

I o quèks smangnes, j'os canté unne canchon ed Charles Aznavour qui s'lonme "ech mère". Ech conte d'unne mère qui vo moérir, et tous ches gins vien'te i dire adé.

Din ch'canchon lò, Charles cause un tans dech l'Avé Mèrie, canchon rligieuse. Bèle canchon qu'est echl'Avé Mèrie. Tout comme l'prière "ej vos salue Mèrie", eq j'os mis chu min blog, à droète, dsou ech "Not Père".


Bec à toutes ches Mèrie, comme, pèr eximpe, emn nièce, o m'bèle-soeur.

Canchon ed ches tiots cabotans

Lundi, alorss, eq j'étoais in vagances avuc m'fanme, os sonmes aller bir un ju din un café.

D'un keup, vlò uit o nu gins qu'arrive'té étou pour bir un keup. Is pu'te ; granmint ed gins sont in vagances et ainme'te ed tans in tans bir un tiot keup. Avuc troés o quat jonnes éfants.

Pi, unne des fanmes, qu'étoait pèrmi eux, s'met à canter "Comme ho font, font, font, ches tiots cabotans, comme ho font, font, font, troés tiots tours etpi ch'in vont". In bougeant ches mans.

Alorss qu'em fanme et mi pèrtoème, ej dis à cht'onme qu'étoait chu l'caïèle à côté del fanme qui cantoait :
-" Ch'est unne moaitresse d'école in vagances ?!"

-" Ch'est unne moaitresse d'école in vagances."

L'fanme m'o rbéïé, avuc ed saprés ius.

Bec à min bieu-frère qu'o ches ages innui.

Ches quat saisons

L'ivèr, ches courts jours.

Echl'ernouvieu, ech boin tans.

 Echl'étè, el boinne saison.

Echl'apréseu, aprè ches moédeus ed blé, minme chi achteure, ches moédeus kminche'te in join.

Et tu rkminches.

Ivèr,

Ernouvieu

Etè

Apréseu.

Et ale, ale est toudi lò au matin, toudi avuc ech casake et ches sos ed vetemints.

Ches quat saisons, ch'est mie toudi du Vivaldi o unne flanmike italienne à minger.

Kmint grandir

L'eute jour, unne ed mes filles disoait à un tiot eq ches nuits, ch'est lò ò eq tu grandis ech puss.

Alorss, j'os esplitché pourquoé.

In jornée t'os souvint tes piés qui sont chu tère. Don, t'os qu'et tête et tin co qui peuche'te grandir.

Mais l'nuit, t'os rin qu'impêque tes piés et tes gambes ed grandir. Don, tu grandis miu ches nuits, vu qu'i o t'tête, tin co, tes piés et tes gambes qui s'allonge'te.

Falloait simplemint l'esplitcher. Chin rire.

Ete soumis

Et nan ête dsou Mimie. H'est p't'ête bin et régalant, mais ej pux mie in causer chu ch'blog.

I o quèks moés, ej t'os causé del chouette Berthe et d'Houellebecq.

In janvié, jé rbée ech télé et qui qu'ej voés, Michel Houellebecq qui présentoait chin nouvieu live.

J'avoais intindu causer ed chin darain, in deus-mile-dis, ech carte et ech territoére, eq j'os mie lu et qu'avoait ieu ech prix Goncourt.

Mais lò, l'présintation à l'télé m'avoait baillé invie del lire. I m'sanne qu'ech sujet étaoit bin d'achteure. 

Minme chi os ainmons mie toudi quoé ech qué ches écrivains i pinse'te o ch'qué ches gins font, o ont foait, feut ed tans in tans lire leus lives o leu histoère. Pour miu comprinde et ête moinss nikdouille.

Pèr eximpe, i o trinte-quat ins, j'os lu ech l'histoère d'un allemand. Ch'est mie pour ho qu'ej su comme li o eq j'os invie d'ête comme li. Chi un jour, j'os keupé tous mes cavieus, ch'étoait pour vir à quoé eq j'alloais rsanner. Rin d'eute.

Mi, j'acate ches lives qu'ont granmint ed pages, mie d'image chu l'couverture et qui sont écrits tiots. Et lo, ho sanne ête comme ho.

Mais vu ches evénemints dech sèt janvié, j'os rin acaté.

Mais jou eq ch'est ête libe ?

Ju d'étè

T'es in vagances, o des keups, t'os rin a foaire din etn'interprinze. Alorss, ej té propose un ju pour démucher l'Frinche.

Truvoe, chu unne carte, ches tiotes villes d'apré, toutes in Frinche :

Zermezeele,
Schirmeck,
Bignan,
Ech Bérarde
Drincham,
Plouzévédé,
Espalais,
Vaumeilh,
St-Pierre-ed-ches-tripiers,
Quistinic, et nan Questunic,
Boesenbiesen,
Waldam,
Laverhne,
Montcuq,
Telgruc-chu-ches mèrs,
Etsaut,
Hesdigneul-ches-Boulogne, ho, i m'sanne h'est aisié à dviner,
Illhaeusern,
Mallefougasse-Augès,
Cropus,
Prinsuéjols,
Guémar, mais soin, ej cause ed ville, et mie dech viu coureu,
Zutkerque,
Castanet.

Amuse-té bin. Boin voéyage.

Acatons frinchoais

... qu'is di'te ches poéyisins frinchoais.  Et pour nos esplitcher ho, is manifest'te, bloque'te des voées, art'te ches camions qui vien'te d'eute poaiyis d'Urope.

Mais avuc quoé font-i tout ho ?

Avuc leu tracteu.

Deutz, New Holland, John Deere, Massey Ferguson, ed des keups, Renault. Ches mèrques ed leu tracteu. Rbée ches images.

Ches quat premiers sont allemands o anméritchains.

Tout vo bin.

"Acatez frinchoais ! Mais mie nos"

Sapré eximpe, qui moutre bin qu'i o granmint ed nikdouilles, malureusemint, pèrmi ches poéyisins.

Et avuc ho, j'os mie causé ed ches tiotes grainnes qu'is baille'te à minger à leu vakes o leus coéchons et qui vienne'te dech Brésil.

Qué bèle voéture

Comme tertous, tu pux voéyager in voéture. Minme chin avoèr ed voèture, et bin seur, chin in agriper unne.

Pour ho, tu t'mets chu ch'bord d'unne voée, avuc tin pouce in heut. Pi t'attinds.

Unne voéture s'arte.

Un keup, ho put ête unne voéture chin toét.

I foait bieu, et tu foais deus-chint kilomètes din chte voéture. Avuc ed l'air. Et du solé !

T'os rin poaiyé, mais troés jours apré, tes bros s'souvien'te coèr dech voéyage. Is sont granmint rouves. Os pouvons dire qu'is ont asis.

Alorss ech prochain keup, foais soin à ti.

Becs.