Canapes

L'eute jour, din un article, ej t'o causé ed ches étchipes et fotbal ed Canapes.

Jé m’souviens d'un jour où j'avoais été vir ches jonnes juer.

I n'avoait un, drière, qui s'étoait foait indjeuler pèr un gars qui, comme mi, rbéyoait ech match. Ech tiot jonne s'arrête ed juer, prind ech bale et dit à cht'onme :

-" Quoé eq t'os ? T'es mie ureux ? Tu vux prinde em place ?"

L'eute o été  granmint surprins et ch'o tai. Ej sais mie chi l'o révnu vir ches jonnes lo d'eutes keups.

Qué date

L'eute jour, i foaisoait bieu tans.

Din ch'train, in face ed mi, unne jonne fanme, p't'ête vint ins, s'assit avuc ech tiote fille, dis-uit moés, djo, qu'avoait granmint invie ed bouger. Mais ch'est mie dech tiote qu'ej vux et causer.

Ech fanme avoait unne boaiyète à bertèles.

Chu ch'dsu d'un ed ches tètes et chin tcheur, i avoait quèk cose ed tatouer : XXI-VIII-M   X.

Ej foais mie atincion, pi, d'un keup, je m'dis eq ch'est unne date. XXI , cho foait vint-et-un ; VIII, uit, cho correspond à ch'moés d'eu ; M, ch'est mile.

Mais, à cose d'unne bertèle, tu sais mie quoé qu'i o inter M et X.

Et lo, chi tu vux mie aller tout droét in prison, tu touches mie ech bertèle. Ed minme, tu dmindes mie à ch'jonne fanme.

T'os qu'ech droét ed maginer.

Ech X et ches âges del tiote, ch'est mie possibe. Dech keup, ch'est ches âges à ch'jonne fanme, o dech père dech tiote. Mile-nu-chint-quater-vint-dis-nu, cho s'écriroait  MCMXCIX. Cho frait vint-chonc ins béto !

Mais ej sais rin. Ej séroais janmoais.

Chi tu lis echl'article eq ch'est ed ti qu'ej cause, o chi t'os étou tes ages din troés jours, ej te fais un bec spécial.

A connoaite pèr tcheur

Chi tu vux foaire del politique, tu doés connoaite pèr tcheur ech phrase lo :
- "Ej vos rbée droét din ches iux et j'vos dis eq j'o rin foait ed mau."

Etpi, tu doés mie rire quanq tu l'dis.

Chi t'os dech corage, tu pux ajouter :
- "Ej su vot onme pour edman."

Et nos, feut croère !

Ches jonnes sai'te

Vint ins, et i sai'te

Foaire boulir de l'ieu pour tchuisiner, conduire, ringer ; I sai'te.

Des keups, bin miu eq leu parents. Qu'i pèroait !

Quanq is sont tiots, tu leu  nettoées ech tchu, et à vint ins, i sroai'te miu eq ti. Tout !

Ches parents pu'te avoèr granmint ed mau, à leu tcheur, ed les vir comme ho. Et cho, ches jonnes l'sai'te mie.  O vu'te mie l'savoèr.

Un jour, ches parents pèrt'te. Et lo, ches jonnes rgret'te. Mais ches parents rvaront mie janmoais.

Achteure, os ainmons quanq minme nos jonnes, et pour  toudi.

Premier sectimbe

-"Mais quoé qu'ej vos foaire dman, o l'prochaine smangne ?" Eq des keups tu t'dis.

Mi, j'o un premier sectimbe djo bin rimpli.

Un éfant pèrt in Chine, sis moés ; Un eute vo in Russie pour dis moés. Et un troésienme nos tchitte pour aller vive avuc chin Jules. Qui s'appelle mie Jules in vrai. Tertout ech premier sectimbe.

Ho vo foaire granmint vuide d'un keup. Mais ches troés sont ureux. Quoé dire ? Rin. Qu'ej sus fier d'eux.

Edman, timpe au matin

Edman, timpe au matin, achl'eure où blantchit ech campaingne,  
Ej pèrtirai. Voés-tu, ej sais eq tu m'attinds.
J'iro pèr ech ville, j'iro pèr ech train,
Té rjoinde ach montagne.

Ej mèrcherai ches iux fixés chu ches montaingnes,
In rbéyant tout, chin intinde ed bruit,
Avuc ti, ech dos courbé pèr ech poéds dech sac,
Ureux, comme tous ches ins.

Ainnieu ed Diu

L'eute jour, un diminche, ej vos à unne messe.

Apré ech Not'père, ches canteus, et mi, j'ainme canté, cantons echl'ainnieu ed Diu. Fin bieu, avuc unne bèle musique qu'os intindons mie souvint. Bèle, et bin cantée, à m'foaire braire.

Ej rinte amon mie ; J'o oblié ech musique. Brin !

Deus jours apré, à l'hôtel, au mitan del nuit, ej me rinville. D'un keup, ech musique me rvient à l'esprit. Alorss, j'o canté echl'ainnieu ed Diu.

Au matin, j'avoais coèr un keup tout oblié. Edpi et achteure, toudi.

Troés cousins

- "Quoé qu'os foaisez, ches jonnes ?"

- "Os allons mèrcher uit jours in montaingne."

- "Os êtes troés frères ?"

- "Nin ! Troés cousins."

- "Kmint eq cho ch'foait ?"

- "Nos pères sont frères."

- "Ej comprinds qu'os vos rsannèche."

- "Nos méres sont soeurs."

- "Etou ?"

- "Etou !"

- " Rin d'eute ?"

- "Os sonmes tous troés ech premier éfant ed nos parents."

- "Etpi coèr ?"

- "Nos premiers éfants, ch'est deus filles."

-  "Et bin ! Os êtes des boins."

- "Ouais, mais tu nos ercrands. Adé !"

Atincion quand tu cantes

J'o intindu, l'eute jour, timpe au matin, eq ches étoéles cante'te. Janmoais intindu unne étoéle. Ch'est normal, feut eds appareils.

I o eq ches scientifiques qui pu'te acouter ches étoéles. I n'o minme un qu'éroait foait une plate ed musique.  

Quanq is acout'te, i pu'te dire ech poéds, ches âges et minme ech structure interne et l'composition chimique ed ches étoéles.

Toutes ches étoéles cant'te, i péroait. Mais tous ches canteus sont mie eds étoéles. Et vlan ! Din leus dints.

Mi, j'l'o djo dit, j'ainme granmint canter.

Achteure, jé m'dminde chi i o mie du dinger ; Eq ches scientifiques connoai'te tout ed mi ?!

Chide

Ech keup d'chide. Mie confonde avuc ech Cid ed Corneille. Lo coèr, mie confonde avuc unne cornaille, noèrte.

Ech chide ! Ech vrai boin chide ed cinse, comme l'foaisai'te troés ed mes onkes. Pèr eximpe, onke Zèfe. Avuc des punmes...à chide.

Ech chide eq tu sers quanq t'invites des gins eq t'ainme.

Ech chide eq chi t'in boés un tiot molet à chonc ins, t'es seu.

Ech chide lo est granmint boin.

Etpi, i o ech calva, eq tu fabriques avuc ech vrai chide. Un jour, amon min conmarade Bébert, j'in o vu quarante lites din un bidon ed lait. Ech calva, qui vnoait d'ête foait, étoait keud.

Un boin calva, quanq t'in boés, tu pux i truvoèr un goût ed punmes. I in o.

Ariane

Ej t'ainme.

T'es jonne ; Ej t'o vu naite in dis-nu-chint-soéçante-dis-nu, ech linnemain dech vint-troés déchimbe. Ho foaisoait sis ins qu'os causoème ed ti. T'os fini pèr arriver.

Edpi, t'os bin grandi et tu t'es améliorée.

Tu t'invoés in l'air granmint souvint. Edpi toudi. Avuc eds uropéyins et eds anméritchins. Des keups, avuc des japonais.

Tu perds toudi et tète, et quanq tu rtcheus chu tère, tu rkminches comme chi de rin n'étaoit. Perde et tète, ch'est normal ; Toutes ches fusées foai'te ho.

P't'ête qu'un jour, tu m'fros foaire un tour.

D'ichi lo, continue ed bin ouvrer.

Quat eures

O sèse eures.

Os-tu djo bin rbéïer ech nombe quat chu unne horloge d'église ?

Souvint, tu voés IIII et mie IV

Ches gins qu'ont foait ho n'vouloai'te mie qu'os confondonche ech quat et ch'sis ; IV et VI. Vu eq ches chiffes sont écrits à l'invers.

Etpi, ch'est esthétique, avuc un étchilibe gauche - droéte. I pèroait.

Tout cho pour vot tchulture.

Bec à tertous.

Ches clokes sonne'te

Din tous ches villages ed Frinche, ches clokes sonne'te.

Ch'est pour nos rappeler qu'i o chint ins innuit, ch'étaoit ech mobilisation, jusse avant ech première grande djerre.

Silinche! In mémoére ed ches gins qui sont pèrtis et qu'ont, des keups, mie érvénu.

Jaurès

Jaurès est mort un trinte-et-un juillet. Mort, assassiné. In dis-nu-chint-quatore. I o chint ins innui.

"Pourquoé ont-i tué Jaurès ?", cantoait Jacques Brel. Bèle canchon, comme toutes ches canchons dech canteu lo.

Jaurès, chincante-quat ins, écrivoait eds articles, comme mi.

Il étoait pacifisse et faisoait tout pour qu'ech première djerre dech monde n'vienche mie. Mais, ho plaisoait à mie à tertous. Et i n'o un qui l'o tué.

Ech canche ? Ed mourir in juillet quatore. Il o mie vu ches jours et ches innées d'apré.

Coés ed dates

J'o ch'droét ed prinde des vagances. Mais ej vux mie vos laicier chin nouvèles.

Dech keup, ej vos prépère toudi quèks articles in avinche. Apré, j'o ech coés din ches dates pour eq tu les voés.

Chi inter tans i s'passe quèk cose, et qu'ej pux écrire un article dsu, je l'foais. Eutermint, t'attinds min rtour et chi ej vux in causer..

Lo, ej sais eq j'o din m'so eds articles fin régalants. I m'sanne. A ti de m'dire.

Chi os êtes vagances, pinsez à foaire suire vot abonnemint à ch'site ; Quanq i plut à dague o qu'i foait granmint keud, tu lis ches articles. Quanq ches éfants dor'te apré-nonne, tu pux rbéïer. Quanq i n'o un o unne qui ronfe et qu'tu pux mie dormir, tu pux lire.

Quoé qu'i n'in fuche, boin été - j'o mantché d'écrire "apréseu" vu ech qui tcheut dech tans et qu'os s'croéroème in octobe - à tertous.