Ech début d'unne boinne mèrche

In Frinche, t'os granmint ed kmins qui méne'te à St Jacques ed Compostelle. I n'o un qui part du Puy-in-Velay.

Cho kminche pèr une bénédiction timpe au matin, à sèt eures, din ech cathédrale. I o lo eds améritchains, autritchiens, echpagnols, alleminds et frinchais, des jonnes et des viux.
Aprés, o t'baille unne tout tiote médaille in forme d'écaille...ed St Jacques, o tamponne tin crédinciale, o t'dit "boinne mèrche", et tu pèrtes.

Pour cho, t’avanches au mitan del cathédrale, tu dévales des mèrches, tu tornes et t'arrives seulemint al porte ed sortie dech cathédrale. Unne grinde porte d'o tu voès el ville et un molet ech kmin ed St Jacques ed Compostelle, ech GR soéçante-chonc.

Boin voéyage.

El caïele ed....Vaylat

Tu t’souviens dech devinette d'i o un moès ; Unne photo ed caïele din unne église.

Ech photo l'o été prins à Vaylat, tiot tiot village inter Bach et Lalbenque, din ch'Lot.
El boinne réponse, ch'étoait "ech Lot".
I n'o deus qu'ont trouvé ; I n'o des millars qu'ont mie traché.

Ech message chin siniure

Ech matin, em fanme rbée chin téléphone portable. Din cheul keup, ale o un message, chin siniure, qu'i dit :"voulez-vous supprimer le contact "mon chéri" ?".

"Mon chéri" am fanme, in principe, ch'est mi. Al frousse eq j'o eu ! I ovoait-i un tueux muché qui m' surveilloait et prêt à m'escoffier ?

Al o répondu "nin". Mais achteure, éj freumerai qu'un euil et dormirai chu une seule éreille.

Unne boinne fabritche

T'os eds abattoérs et eutes interprinses qui  freume'te, mais t'os unne fabritche qui foait chin bure, ch'est unne qui fabritche des bonnets rouves ; I n'in vinde'te des miles et des miles achteure. I foait mie froéd ; Ch'est l'mode.

Et cho, ch'est grace à un onme, ech merre d'une tiote ville o mitan del Bretagne.
A min avis, ech gars lo, i vo ete élu présidint. Del Bretagne libe. Voère miu.

Unne mère est défunctée

Ch'étoait merkerdi. C'te mère, éj l'o conné mie granmint. Ch'est es'fille qu'est unne amie.
Mi, j'o dmindé à min père ed l'atcheuiller lo o il est djo, et d'i foaire unne visite ed ches lieux.

Mais, vu el londjeur dech week end à keuse dech premier novimbe, i o mie d'interremint avant lindi.

El mère put attinde ; Mi, feut qu'éj prévienche min père qu'i vo s'foaire du mourron.

Unne pinsée pour ches fiux, filles, tiots fiux et tiotes filles, et tertous ches saints.

Ech treu ed mémoére

Ej vos avoér tchinze ins, sus boèn élève jusqu'lo et i feut pinser achl'avnir. Avuc em'mère, os sommes aller vir unne consillère d'orientation.

"- Quéq'tu vux foaire ?" qu'ale m'dit.
"- Maçon" eq j'i réponds.
"- Quoé d'eutes ?" qu'ale m'dit coèr.
"- Camionneu  international " mi j'i dit. Ej vouloais vir ches pays in ouvrant.

J'o un treu ed mémoére ; Ej sais mie kmint cho ch'est fini.

Troès moès apré, j'étoais dins un lycée.
Mie pour apprinde el maçonnerie o el mécanique, mais chés maths, del physique et étou edl'histoère, edl'allemind, et du frinchais.
Comme chi mi j'avoais dzoin d'apprinde ech frinchais.

Ech parti politique dispèru?

L'eute jour, éj croése un vastépluque, ch'est un gars qu'i n'o mie toute es tète, qu'i s'cause à li minme. L'étoait in train ed causer dech parti communichte.
J'o réfléchi un molet et j'm'sus dit qu'o n'intindoait plu causer edpi queq'moès, voèr ed ins.
L'est o ech drapeau ? Qu'o qu'i foai'te chés militints ?
Georges, Robert, révnez ! Is ont dzoin ed vos, chés purichtes.

Qué famille !

Lolo et s'fanme ont quat fiux :
- Edmont, belge, troèze ins,
- Nicolaïev Popovitch Nichtérovitch, russe, dis ins,
- Matthiew, inglais, sèt ins
- Seb, monégaste, sis ins.

Edmont, chaq foès qui voét quéq'un, i dit :
"- min grind frère o dis ins."
Seb ajoute :
"- mi, min tiot frère, sèt ins."
Chés deus eutes di'te :
"- cho,ch'est bin vrai."

T'os comprind ?

Kmint eq ch'est el bonnur ?

Avec miu d'un quèrt ed siéque passé avec em fanme, éj pux dire kmint eq tu sais qu'unne fanme est ureuse.

I o d'abord ches mots et ches gestes tindes qu'ale ét dit o foait souvint ; "Min tiot co", "min cros codin", "min corageux". Chin oblier ech cros bec quint ale té rtrouve.
Mi, j'o tchèr étou quind ale tchuisine unne vianne bolie, unne crême o eute pour ém foaire plaisi.

Unne fanme qui t'ainme, des foès, ale met ed bieux abits pour ti ; un cotron o unne boaiyette régalant, et per dsous, unne tchulote bélote, eq tu pux i avoèr acater.

Chi t'fanme kminche à mie foaire o dire cho, chi ale voét eq tes défeuts, lo, i o du malur à vnir. Acate z'i un bouquet ; O ale l'garde, o tu l'prinds dins ete dgife : Tu séro.

Mi, achteure, j'o rin érchu ; J'o raboaissié ém dgife.

T'es mie frinchaise

In Frinche, i o queq' moès, unne fanme rom prind un bus et ch'assit.

T'os unne eute fanme, un molet plu vieille, qui monte. Pu unne place. Kminches à indjeuler ech fanme rom et à i dire eq ch'est mie unne frinchaise. Ch'étoait vrai ; Tu pux mie dire ech contraire.
L'eute vivoait in Frinche edpi chincante ins et causoait ech franchais comme unne vake echpagnole.

Dins cht'histoère, i avoait unne uropéyinne

Ech leu

Ech leu o mingé el mère-grind, ech tiot chaperon rouge, el galette et ch'pot ed beurre.

Achteure, i minge ches berbis o madgètes eq chés paysins is ont grind mau à heucher. Chés écologischtes is disent qu'i feut mie tuer ech leu.

J'ainmeroais qu'ech leu i morche queq' gambes d'écologischtes o minge leus tchyins.

Min playmobile

Ej connoais une jonne et tiote fanme qui cause tout l'timps.

A s'visine et amie :
"...et blablabla, et blablabla,...
...ej sus p't'ête inceinte d'un moès, o i l'est mort. I o unne canche chu deus...
..et blablabla, et blablabla,..."

Ale étoait inceinte. Mais os vos in motchez. Mi étou, mais ale causoait comme chi is étoai'te tous deus.

Ale ne sait mie, mais éj l'appéle playmobile, comme ches jux, à keuse dech keupe et dech couleur ed ches cavieux.

"...et blablabla, et blablabla,..."

Ches tags

Un tag, ch'est quéq'cose d'écrit avec un keup ed peinture.

A ches débuts, i o trinte ins inviron, ch'étoét in noér et chu un mur. Tu comprindoais mie ech sins et ch'ti qui foaisoait cho, et qu'étoét attrapé, étoét puni. Des foès, i dvoait nettier ech mur.

Achteure, i o des couleurs, des tags étou chu ches trains et i o des gins qui sont poéyés pour in foaire. Ch'est vrai qu'i n'o des bieux. Tu pux vir, perfoès, eds expositions din l'rue.

I n'o étou eq tu te dmindes commint qu'i ont foait pour aller peinturlurer ach t'indroè chin es foaire ed mau.

Mais tu comprinds toudi mie ech sins.

Ech bicycleu

Ej vux causer d'un gars qu'éj voés rédjuliéremint chu eche bicyclette.

Quind éj vos ouvrer, éj le voés aux inviron ed sis eures tous chés matins, tans non tans, ech qui vut dire, qu'i plu, qu'i nège o qu'i vinte. I l'o chin espincèr ganne qui mile chu chin dos.

L'eute jour, éj l'o vu rintrer ; Je n'sais mie exactémint o il habite et o il ouvre, mais cho foait miu ed sis kilomètes. Et chin vélo, ch'est mie pour foaire ech Tour ed Frince.

N'in vlo un ed corageux.

Et ti, et ti et ti

Ed miu in miu.

Tu connoais el canchon ed Jacques Dutronc, "Et mi, et mi et mi".
Mi, inn'hui, éj pux écrire, in causant ed vos, ches visiteux dech blog :

"Un vénézuélien edpi uit jours,
Et ti, et ti , et ti,
Quind chés eq tu varos vir ?
Un macédonien étou edpi uit jours,
Et ti, et ti , et ti,
Quind chés eq tu varos vir ?
Dis indonésiens echte nuit,
Et ti, et ti , et ti,
Quind chés eq tu varos vir ?
Irlindais, russes, alleminds,
Coréens dech sud,
Serbes, royaumunieux
Ed timps in timps
Et ti, et ti , et ti,
Quind chés eq tu varos vir ?
Ukrainiens, améritchains
Et frinchais rédjuliéremint
Et ti, et ti , et ti,
Quind chés eq tu varos vir ?"

Dech blogger ureus