Ech viu frinchoés

In Frinche, il existe deus seurtes ed frinchoé causées : ch'frinchoés, d'achteure, et ch'viu-frinchoés.

Ech viu frinchoés, ch'est des mots qu'ont cangé o bin dispèru. Os les utilisons pu.

Quèks eximpes : 

- Chinglier : ch'est un bétail qu'existoait in chincante-deus avant eq Jésus naiche, din ch'village d'Astérik et Obélisk. Et i in o coèr achteure, pèrtoute in Frinche. Diminche au vèpe, m'fanme et mi avons mantché d'in tuer un cros.

Don, ch'mot est viu mais coèr utilisé. Conme brin, mautcheurant, pichier, massaque o coèr, abominabe.

- Assoter : cho vut dire "qui rind nikdouille". Vlò un mot qu'os utilisons pu. Minme cose pour masticatoére.

Ch'est don du viu frinchoés.

- Beurète : i sanne qu'avant l'in sis-chint et minme mile-trinte-troés, ch'mot existoait mie. Mais in mile-nu-chint-quater-vint-uit, lò, ch'mot existoait. Conme ch'mot aréoport.

Os pouvons don écrire eq ch'est mie du viu frinchoés. 

Eh bin in vrai, ch'est quanq minme du viu frinchoés : achteure, feut pu utiliser ch'mot beurète (mais os pouvons coèr utiliser aréoport quanq os causons d'aréoport). Os avons don un mot nouvieu qu'est djò viu. 

Pour un viu conme mi, cho surprind granmint*. Ch'est pour ho qu'i o quèks smangnes, pour conter un voéyage et unne bèle rinconte foaite, j'avoais utilisé ch'mot. Chin savoèr qu'i falloait poin. Des gins eq j'ainme granmint et à qui ej causoais ont mantché d'em tuer.

Innui, pour dire eq t'os causé avuc unne beurète, feut dire eq t'os causé avuc unne "fille qu'o ches pérints (o ches taïons) qu'ont né din ch'nord ed l'Afrike".

Toute i vo bin.

Boinne jornée.

*ureusemint qu'un nveu qu'o s'mère qu'o né in Algérie m'o rasseuré.

Min bieu-frère m'o bin aidié

Verdi au matin, jé dvoais réponde à unne tchestion pèr ouais o bin nan. Mais ej térintoais granmint. Conme Escartéfique quanq i juoait à tchèrtes avuc César, Panisse et Brun. "J'mé déminde chi Panisse i keupe à tcheur !"

Mi, j'avoais invie dé dviser avuc m'fanme pour mie foaire ed berlure.

J'o mis truvoé m'fanme à ch'momint-lò mais j'avoais un bieu-frère assis à main droéte et i m'o aidié à coésir ; i s'o mis in prousse in disant eq ch'étoait in vrai fin aisié ed réponde et o ieu invie ed lancier chin ordinature din l'pièche dò qu'os étoème.

I m'o sanné comprinde, adon j'o dit nan conme réponse à l'tchestion.

Et min bieu-frère - eq j'ainmoais bin - o mie lancié chin ordinature et m'o dit eq ch'étoait bin.

J'étoais fin ureus d'avir foait l'boinne réponse.

Aprè-nonne, m'fanme, qu'étoait achteure rvenu, et d'eutes gins m'ont étou posé l'minme tchestion et lò, j'o répondu eq ch'étoait nan. Chin térinter.

Merchi à min bieu-frère.

Boinne jornée.

J'os blotché ches voées

Pèr solidérité avuc ches cinsiers qu'ont des vakes, ièr, j'os blotché ches voées. Minme chin avir ed ches bétails à m'moaison.

Vu eq j'étoais tout seu, j'os coési unne tiote voée pour ête seur ed pouvoèr agir ; put eq'mantcher, ech puss important est ed moutrer del'solidérité.

Rbéez lò-dsou ech clitché edl'indroét :

Et j'os réussi à mette ch'brin : unne gin o arrivé. Ale avoait prins, p't'ête pour passer inaperchu, un cros tracteu et unne rmorke drière rimplie ed fyin. J'm'os mis au mitan del voée et ale o étè obligé d'arter. J'i o adon espliqué min geste.Ale o comprins aisiémint pi o pèrti, chin m'équèrbouiller, pour s'otchuper ed ches vakes. Qu'ale o dit qu'ale avoait.

J'espère eq ches cinsiers apprécieront mn'attitude. Etpi, j'espère eq du keup, eq diminche, is m'laiceront passer.

Boin judi.

Quater-vint-dis-nu frincs

Os vos ramintuvoez ed ches frincs ? Avant ches uros !

In mile-nu-chint-quater-vint-quatore, ech jour ed min sisienme jour d'ouvrage din chl'interprinze eq j'os tchitté début déchimbe deus-mile-vint-chonc pour pèrtir in rtraite.

Os étoème in octobe, ej dormoais din un hôtel et dvoais m'déjoutcher à chonc eures quarante-chonc. 

Mais ch'patron edl'hôtel o oblié d'em rinveiller.

J'os quanq minme alé ouvrer, avuc del canche, et après-nonne, j'os acaté un tiot réveil ; quater-vint-dis-nu frincs, qu'i valoait.

Malureusemint, ièr, min tiot réveil est mort. Jou eq ch'est normal, seulemint trinte-et-un ins aprè ? J'os bin invie d'értorner à l'boutike réclamer qu'ale rinde emn argint. 

Mais in uros.

Os in pinsez quoé ?

Boin lundi, surtoute chis os ouvrez et qu'os vos déjoutchez fin timpe au matin.

Is font croère

J'os rmèrtché, edpi quèks smangnes, qu'i o des gins qui s'otchupe'te d'eutes gins in leu disant qu'is dvroai'te s'soégner adon eq ches gins à qui ches eutes is cause'te sanne'te in boinne santé.

Des keups, j'mé dminde chestchels ont un mau.

Mi, unne gin qui m'diroait cho, ej croés eq j'éroais invie d'em seuver.

Busez.

Chin ête un égoïsse, il faudroait p't'ête eq chatchun s'otchupe ed chin tchul.

Boin diminche, et boinne fête à Didi.

Ch'est Noë pour tertout

Tertout, ch'est ches éfants, leus pérints, leus taïons, leus voésins et minme ches méchants et ches mawais.

Adon, magine unne jonne fille qu'arrive din unne moaison ech vint-chonc dech moés ed déchimbe et qu'éroait mie ed cadieu. Et ale sroait l'seule à n'mie in avir. El pauve ! Ches eutes invités sont ureus, et ale, ale o rin. Et seuremint qu'ale diro rin ed rin avir.

Mi, chi j'apprindroais cho, ej sro trisse pour l'jonne fille et j'éroai invie d'i foaire un tiot présint. Un tiot présint pour qu'ale fuche ureuse ech vint-chonc déchimbe.

Un tiot présint, cho put ête du chucolat. Ch'o un cros avantage, ech chucolat, ch'est eq quèks moés aprè, tu pux ed nouvieu in offrir.

D'avinche, boin Noë à tertout.

Ches méchants et ches mawais divorche'te

Et i o qu'eux.

Ches boinnés gins, eux, is attinde'te qu'i in o un qui meurche pour tchitter l'eute. Quanq is ont mèrié, ch'tchuré o dit :

- os avez mèrié justch'à ch'qué l'mort vos sépère."

Adon, ches boinnés gins respect'te ch'tchuré et attinde'te. Minme quanq des keups, ch'est fin malaisié pour l'un o l'eute o ches deus.

Mi, j'admire. Et j'ainme.

Boinne jornée.

Ej pinsero à vos

Avant-ièr au vèpe, adon qu'unne famille avoait décoré sn'appèrtémint pour ches fêtes à vnir, leu grin garchon ed quat ins d'âge dit à ches pérints :

- "Os savez, quanq os srez morts, j'écrirai vos tiots noms chu l'erfroédioèr et conme cho, ej mé ranmintuvrai ed vos."

Vlò un galibié qu'o unne fin boinne idée. Ch'est vrai eq des keups, os oblions kmint s'lonmer nos pérints. Et pour nos frères et soeurs ?

Busons.

Boin merkerdi. Surtoute pour ches éfants qu'os ainmons et qui, eux, nos font rire.

Bec espécial à mn'nièce Clémence qu'o ches âges innui et qui sro béto unne tante.

I n'o un qui perd

Diminche, un grin tiot garchon ed troés ins d'âge vo vir s'mère avuc un ju et i dit :

- "El mère, j'os lu ches régues (ED : à troés ins !!!! J'os du mau à l'croère.). Ej t'esplique : chi t'os perdu, mi j'os gaingné. Ch'est écrit lò. Rbée !"

El mère et chin fiu ont jué, et ch'galibié o gaingné.

Mi, ej dis eq chi ch'tiot est put mie, achteure, savoèr lire, il o quanq minme granmint ed gingin.

Bec à tertous et boinne jornée.

Rdevnir jonne

Ch'est un mirake ? Puss ches jours is passe'te, puss m'fanme dvient jonne.

Kmint-jou eq ch'est possibe et qu'ej l'voéche ? Lisez :

I o quèks innées, m'fanme - et mi -, os alloème coutcher alintour ed vint-deus o vint-troés eures.

Mi, ej foais coèr cho ; mais m'fanme, ale couque achteure timpe au matin, alintour ed quat eures. I o deus o troés ins, ch'étoait alintour d'unne eure, et i o quèks moés, ch'étoait alintour ed deus eures.

Coutcher à quat eures ! Conme ches jonnes quanq is vont dincher l'sinmdi. Eux, ch'est un keup pèr smangne, mais m'fanme, cho put ête chake jour. O disons, chake nuit. Et à uit o nuf eures, ale déjouque.

Fin jonne, qu'ale dvient.

Chi ale ouvroait coèr, in deus jours, ale pourroait avir foait ches eures d'ouvrage qu'ale éroait à foaire.

Boinne jornée, et boinne nuit.

J'os boinne conscieinche

Feut qu'ej vos l'diche, chi os l'savez mie, mais edpi quèks innées, j'os un cros mau ; cho s'voét p't'ête mie, mais j'in os un.

Es soégner pi djérir ! Fin malaisié. 

Ch'est pour cho eq j'in o mie causé.

Ej sais eq des keups, des gins di'te qu'ej sanne imphibie. I n'o minme qu'ont supposé des coses.

Innui, ej vos l'dis : jé m'soégne. Avuc internénet. Et motchez-vos poin, ej vos réussir ! 

J'os boinne conscieinche.

Ale doét gaingner

Innui au vèpe, i o unne rinconte ed rugby inter l'étchipe ed Frinche et chtol-lò d'Eustralie dò ed j'os un nveu qui reste edpi quèks smangnes et pour pour quèks moés.

L'rinconte cangero rin, malureusemint, à l'djère in Ukraine et baillero mie ed gingin à ch'présidint ed ches Anmérikes qu'est ch'puss cros nikdouille eq j'o janmoais vu mais qu'existe.

Mais j'ainmeroais granmint eq l'étchipe ed Frinche gaingne. Pour rinde honmage, d'unne manière, o bin au moinss foaire plaisi à min onke Michel qu'est, in vrai, onke d'ém fanme in étant frère d'ém bèle-mère, et qu'est mort judi.

Min onke, o disons, not onke ainmoait granmint ch'rugby. Il avoait un frère, des nveus - poin mi - et minme un tiot-fiu qu'avoai'te jué ach rugby. Adon pour i foaire plaisi et un clin d'ziu, feudroait qu'echl'étchipe ed Frinche gaingne.

Allez ches bleus ! Adé min onke.

Ech chinglier est mort

Un onme roule in voéture et épeute quèk cose. Il arte s'voéture, rtchule pour vir et voét unne crosse cose noèrte au mitan del route : un chinglier.

I déchind d'es voéture pour aller miu viu ch'bétail qui sanne bin ête mort.

Mais in vrai, l'est mie vraimint mort. Din quèks minutes, il le sro, mais lò, il arrive à s'mette dbeut et à courir. Vers cht'onme qu'est étou obligé ed courir pi grimper fin rade chu s'voéture.

Ech chinglier grimpe mie, ureusemint, mais berzille bin toute chl'avant del voéture.

Pi i pèrte. Moérir din un can.

Ainmer Diu

Avuc Diu, i o deus coses din no'vie : i croère o mie i croère, et aprè, l'ainmer un tiot molet, un molet, un boin molet, granmint o minme granmint justch'à tout vive pour li ; conme ches tchurés o ches rligieuses, mais étou conme d'eutes onmes et fanmes din ch'moude qui vive'te tout seu et qui prie'te Diu chake jour, conme ches tchurés o ches rligieuses.

 

Un onme, tchuré o mie tchuré, o unne fanme, rligieuse o mie rligieuse qu'o mérié avuc Diu pastch'il o ale l'ainme granmint, doét montrer chl'eximple à ches eutes qui eux, i croè'te p't'ête mie granmint o mie du toute.

 

Echl'eximpe ! Estchèl ?

 

Ch'boin eximpe.

 

Maginez un rligieus qui sroait fin mawais, mie agréabe avuc ches gins ! Jou qu'os croéyèche quoé qui dit quanq i dit eq Diu o existé et o dit ed s'ainmer ?

Mi, ej dis nan. Seuremint qu'ej froais dmi-tour.

Edvinète dech momint

Qui o dit :

- "Deus djifes qui se rsanne'te et qu'autchune foait rire font rire insanne pastche is se rsanne'te."

?