Ièr, j'étoais in voéture quanq not premier minisse, chti qu'ièr au matin étoait not premier minisse, annonçoait à tertout qu'i vouloait dvenir présidint.
I causoait bin. Qu'ej fuche honnête.
- "Ej vux..., ej vux.... .Et ej vux..., ej vux..."
J'o mie cartchulé combin ed keups il o dit ho.
Et ch'est mie quoé qu'ej retiens de s'causerie.
Mi, ej croéyoais ête din unne église, à l'messe, quanq ech tchuré cause à ches gins qui sont lò. I avoait un silinche, à pèrt ech nouvieu candidat à ches elections qui causoait.
Et quanq i causoait, ess voéx montoait , pi rdéchindoait, fin grave. I s'artoait un fin tiot molet, pi rkminchoait.
J'avoais invie ed dire "pour ches sièkes ed ches sièkes, merchi", et j'avoais, dech keup lò, invie ed rire que d'penser ho.
Casi seur eq d'ichi quèks moés, j'éro coèr l'possibilité ed rire.
Boinne jornée à tertous.
Aucun commentaire:
Enregistrer un commentaire